गोरखा : गोरखाका मगर समुदायले हर्षोउल्लासका साथ आज माघे संक्रान्ति पर्व मनाउँदैछन् । मगर समुदायको प्रमुख सांस्कृतिक पर्वकारुपमा माघे संक्रान्तिलाई माघीका रुपमा उनीहरुले मनाउने गर्दछन् ।
नेपाल मगर संघ,जिल्ला समन्वय समितिको आयोजनामा गोरखा सदरमुकाममा आयोजित कार्यक्रममा जिल्लाका ११ वटै पालिकाबाट सहभागीहरु आएका थिए ।
उनीहरुले नेपाल मगर संघको कार्यालयदेखि हरमटारीस्थित खेलकुद मैदानसम्म विभिन्न झाँकीसहितको र्याली प्रदर्शनी गरेका थिए । साथै हरेक पालिकामा पालिकास्तरीय समितिले पनि अलगअलग कार्यक्रम गरी माघी मनाएका छन् ।
र्यालीमा सोरठी, मारुनी, झ्याउरे, चुट्का, पाङ्दुरे गीत तथा नाचहरु पनि प्रदर्शन गरिएको थियो भने मगर समुदायले पञ्चेबाजा बजाएर नाचगान गरेका थिए । सहभागीहरुले मगर जातिको मौलिकता झल्किने भेषभुषा पनि लगाएका थिए । उनीहरुले गोरखाको हरमटारीस्थित रङ्गशालामा औपचारिक समारोह आयोजना गरी शुभकामना आदानप्रदान गरेका छन् ।
सूर्य धनु राशिबाट मकर राशीमा प्रवेश गर्ने सङ्क्रान्ति भएकाले माघ १ गतेलाई मकर सङ्क्रान्ति पनि भन्ने गरिन्छ । यस पर्वलाई विशेषगरी थारु र मगर समुदायले मुख्य चाडपर्वका रुपमा मनाउँछन् भने अन्य समुदायले पनि माघे सक्रान्तिका रुपमा विशेष हर्षोल्लासका साथ मनाउने गर्दछन् ।
प्रतिक्रिया दिनुहोस !
