दोलखा : दोलखाको बिगु गाउँपालिका-१ लप्ची जाने सडकमा सुख्खा पहिरो खस्दा एक जनाको मृत्यु भएको छ। अन्य दुई जना घाइते भएका छन्। मृत्यु हुनेमा बिगु-१ का २२ वर्षीय कुसमान तामाङ रहेका छन्।
बिगु गाउँपालिका-१ लामाबगरबाट लप्ची जाने बाटोमा एक्कासि सुख्खा पहिरो झर्दा ढुंगाले लागेर नासा हाइड्रोमा काम गर्ने कामदारको मृत्यु भएको र दुई जना घाइते भएका दोलखाका प्रमुख जिल्ला अधिकारी टुवराज पोखरेलले जानकारी दिए। घाइते हुनेमा सोही ठाउँमा ५८ वर्षीय रसमान तामाङ र २८ वर्षीय दिलकुमार तामाङ रहेका छन्।
उनीहरू नासा हाइड्रोका कामदार हुन्। पहिरो खसेपछि लामाबगरबाट लप्ची जाने बाटो अवरुद्ध भएको छ। मौसम समेत प्रतिकुल भएका कारण हेलिकोप्टर पठाउन नसक्दा घाइतेको उद्धार हुन सकेको छैन।
घाइतेको उद्धारका लागि हेलिकोप्टर बोलाइएको प्रमुख जिल्ला अधिकारी पोखरेलले जानकारी दिए।
प्रतिक्रिया दिनुहोस !
