विराटनगर : पूर्व-पश्चिम लोकमार्गअन्तर्गत मोरङको पथरीशनिश्चरेमा बुधबार दिउँसो यात्रुबहाक बसले सीटी सफारीलाई ठक्कर दिँदा वृद्धा महिलाको मृत्यु भएको छ।
पूर्वबाट पश्चिमतर्फ आउँदै गरेको को१ख ७८३५ नम्बरको बसले पश्चिमतर्फ नै आउँदै गरेको प्रदेश १-०१-००२ ह ११४८ नम्बरको सफारीलाई पथरीशनिश्चरे नगरपालिका-१ मा ठक्कर दिँदा दुर्घटना भएको हो। दुर्घटनामा परेर सफारीमा सवार तेह्रथुम घर भइ पथरीशनिश्चरे-२ मा पाहुना आएकी ८० वर्षीया हस्तमाया गुरुङको मृत्यु भएको इलाका प्रहरी कार्यालय पथरीका डीएसपी गणेश श्रेष्ठले जानकारी दिए।
उनका अनुसार दुर्घटनालगत्तै बस र चालक पाँचथरको मेमेङ घर भएका ३२ वर्षीय अर्जुन राईलाई नियन्त्रणमा लिएर घटनाको अनुसन्धान सुरु गरिएको छ। बसको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ।
प्रतिक्रिया दिनुहोस !
