इटहरी : सुनसरीको इटहरी उपमहानगरपालिकाले पेट्रोलियम पदार्थबाट चल्ने सवारीसाधनलाई विद्युतीय सवारीमा रूपान्तरण गरेको छ ।
सरकारले सवारी तथा यातायात व्यवस्था ऐनमा संशोधन गर्दै विद्युतीय गाडीमा रूपान्तरण गर्न सकिने व्यवस्था गरेपछि इटहरी उपमहानगरले पेट्रोलबाट विद्युतीय सवारीमा रूपान्तरण गरेको हो ।
उपमहानगरले पहिलो चरणमा दुईवटा मोटरसाइकललाई रूपान्तरण गरेको हो । सम्याति इलेक्ट्रो व्हिल्स प्रालिसँग सम्झौता गरेर रूपान्तरण गरिएको इटहरीका मेयर हेमकर्ण पौडेलले जानकारी दिए ।
संघीय सरकारले मर्मत गरेर उपयोगमा आउन नसक्ने र २० वर्ष अवधि पुगेका सवारीसाधनलाई लागतका आधारमा विद्युतीय सवारीसाधनमा रूपान्तरण गर्न सकिने व्यवस्था गरेको थियो ।
देशमै पहिलोपटक स्थानीय तहले यो कामको सुरुआत गरेको पौडेलको दाबी छ । सम्याति इलेक्ट्रो व्हिल्स प्रालिका सञ्चालक आदित्य आचार्यले आफूहरू मोटरसाइकललाई विद्युतीयमा रूपान्तरण गर्न सफल भएको बताए ।
प्रतिक्रिया दिनुहोस !
