शान्ति प्रक्रियाका बाँकी काम टुंग्याउने विषयमा प्रधानमन्त्रीसँग छलफल भयो : अध्यक्ष ओली
माघ १९, २०८० शुक्रबार ११:३८:४५
काठमाडौं : प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच शुक्रबार छलफल भएको छ। सिंहदरबास्थित प्रधानमन्त्री तथा मन्त्रिपरिषद कार्यालयमा उनीहरुबीच शान्ति प्रक्रियाका बाँकी काम टुंग्याउनेबारे छलफल भएको हो।
छलफल सकेर बाहिरिने क्रममा अध्यक्ष ओलीले पत्रकारसँग कुराकानी गर्दै शान्ति प्रक्रियाका बाँकी काम टुंग्याउने बारेमा प्रधानमन्त्रीसँग छलफल भएको जानकारी दिए। उनले भने,' समसायिक विषय र शान्ति प्रक्रियाका बाँकी काम टुंग्याउने सन्दर्भमा कुरा भएो हो। टीआरसी विधेयकबारे छलफल भइरहेको छ। विधेयकलाई राम्रोसँग मिलाएर छिट्टै टुंग्याऔं भन्ने कुरा भएको छ।'
अध्यक्ष ओलीले टीआरसीमा एमालेले राखेको अडान भने कायम रहेको बताए। प्रधानमन्त्रीसँग समसामयिक राजनीतिक विषयमा पनि छलफल भएको ओलीले बताए।
भेटवार्ताका क्रममा प्रधानमन्त्री दाहालले टीआरसी विद्येयकलाई संसदको आगामी अधिवेशनबाट पारित गर्दै शान्ति प्रक्रियाका काम टुङ्ग्याउनका लागि सहयोग गर्न आग्रह गरेका थिए।
माघ २२ गते देखि हिउँदे अधिवेशन सुरू हुँदैछ। टीआरसी विधेयकलगायत केही विधेयकहरू संसदमा पेश गर्ने सरकारको तयारी छ।
प्रतिक्रिया दिनुहोस !
