परासी: नवलपरासीको बर्दघाट नगरपालिकामा ट्रमा सेन्टर निर्माण हुने भएको छ । सरकारबाट रकम सुनिश्चितता भएसँगै ट्रमा सेन्टर बन्ने पनि सुनिश्चित भएको हो । त्यसका लागि नगरपालिकाले जग्गाको व्यवस्थापन गरिसकेको नगर प्रमुख शम्भुलाल श्रेष्ठले जानकारी दिए ।
पूर्वपश्चिम राजमार्गमा बढी दुर्घटना हुने गरेको ट्राफिक प्रहरीको तथ्यांकमा उल्लेख छ । राजमार्गमा हुने सडक दुर्घटनामा परेका घाइतेहरूलाई तत्काल उपचार उपलब्ध गराउनका लागि ट्रमा सेन्टर निर्माण गर्न लागिएको हो ।
सेन्टर निर्माणका लागि मन्त्रिपरिषद्को निर्णयअनुसार अर्थ मन्त्रालयले पत्र पठाएपछि माघ १८ गते स्वास्थ्य तथा जनसंख्या मन्त्रालयले बहुवर्षिय ठेक्काअन्तरगत १५ करोड रुपैयाँ सुनिश्चित गरेको हो । नगरपालिकाले २० करोड माग गरेपनि १५ करोड रुपैयाँ सुनिश्चित भएको हो ।
‘स्वास्थ्य मन्त्रालयले सहरी विकास तथा भवन निर्माणलाई पत्र पठाएपछि बर्दघाटमा नै ट्रमा बन्ने सुनिश्चित भएको छ,'नगर प्रमुख श्रेष्ठले भने । ट्रमा सेन्टर २५ बेडको निर्माण हुने छ । ट्रमा सेन्टर निर्माण गर्नका लागि अघिल्लो वर्ष १० करोड र गत वर्ष ४ करोड रुपैयाँको स्रोत सुनिश्चितता भएको थियो ।
तत्कालीन स्वास्थ्यमन्त्री हृदयेश त्रिपाठीको पहलमा बर्दघाटमा ट्रमा सेन्टर निर्माण गर्न पहिलो पटक रकम सुनिश्चित गरिएको थियो । रकम सुनिश्चित भएपनि जग्गा प्राप्ति हुन नसकेकाले रकम फ्रिज भएको नगरपालिकाले जनाएको छ ।
‘जग्गा नहुँदा यसअघि आएको दुई/दुई पटकको रकम फ्रिज भएर गयो,अहिले जग्गाको व्यवस्था भइसकेको र रकमको समेत सुनिश्चितता भइसकेकाले ट्रमा सेन्टर बन्ने पनि सुनिश्चित भएको छ,' नगर प्रमुख श्रेष्ठले भने । सेन्टर निर्माणका लागि वडा नं. २ स्थित चिसापानी अस्पताल नजिक रहेको राष्ट्रिय आवास कम्पनीको डेढ बिघा जग्गा नगरपालिकाले भाडामा लिएको छ । वार्षिक साढे तीन लाख भाडा दिने गरी नगरपालिकाले आवास कम्पनीको जग्गा भाडामा लिएको हो ।
सघन सहरी तथा भवन निर्माण आयोजना चितवनमार्फत यसै चालु आर्थिक वर्षदेखि निर्माणको काम सुरु हुने नगरपालिकाले जनाएको छ । ट्रमा सेन्टरका लागि प्रकृया अघि बढेका सघन सहरी तथा भवन निर्माण आयोजनाले जनाएको छ । ‘आवाससहित ट्रमा सेन्टर निर्माण गर्न २० करोडको लागत पठाइएको थियो । अहिले १५ करोड सुनिश्चितता भएकाले उक्त रकमबाट आवासबाहेकको भवन निर्माण पूरा गछौं,' आयोजना प्रमुख इन्जिनिरयर झपटबहादुर थापाले भने,'दुई वर्षभित्र काम सक्ने गरी प्रकृया अघि बढाएको छौं । स्टिमेट भइरहेकाले अबको दुई हप्ताभित्र भवन निर्माणका लागि ठेक्का आव्हान गर्छौं ।’
भवन निर्माण यसैवर्षदेखि सुरु हुने आयोजनाले जनाएको छ ।
प्रतिक्रिया दिनुहोस !
