बेनी : म्याग्दीको दरवाङ-धारापानी सडक स्तरोन्नति भएको छ। मालिका गाउँपालिकाको केन्द्र दरवाङदेखि सोही पालिकाको वडा नम्बर ५ फेदी हुँदै धवलागिरी गाउँपालिकाको केन्द्र मुना जोड्ने सडकको धारापानीसम्मको खण्ड स्तरोन्नति भएको हो।
दरवाङदेखिधारापानी पुग्न यसअघि गाडीमा ४५ मिनेट लाग्ने गरेकोमा सडक स्तरोन्नति भएपछि यात्रा अवधि १५ मिनेटमा छोटिएको धवलागिरि गाउँपालिका-७ धारापानीका रिमप्रकाश थापाले बताए। ‘१२ वर्षअघि चन्दा जुटाएर मार्ग मात्र खोलिएको सडक कच्ची साँघुरो र ग्रेड नमिलेको थियो,’ उनले भने ‘घुम्ती तथा मोड र ग्रेड सुधार सँगै अप्ठ्यारो ठाउँमा ढलान भएपछि यात्राका क्रममा सहज र सुरक्षित भएको छ।’
नयाँ मार्ग खोल्ने, ग्रेड सुधार, विस्तार, नाली निर्माण, ग्रेड, घुम्ती सुधार र ढलान भएपछि धवलागिरी गाउँपालिकालाई यातायात सञ्जालसँग जोड्ने मुख्य दरवाङ-धारापानी-ताकम-मुना सडकको दरवाङ-धारापानी खण्डको यात्रा सहज बन्न थालेको छ। सडक सुधार भएपछि यातायातको भाडादर घटाउन स्थानीयवासीले माग गरेका छन्।
२०६७ सालमा स्थानीय बासिन्दा र तत्कालीन गाविसको अनुदानमा एक करोड ५० लाख खर्चेर यो सडकको मार्ग खोलिएको थियो। गण्डकी प्रदेश सरकारको पालिकाको केन्द्र जोड्ने सडक स्तरोन्नति गर्ने योजनाअन्तर्गत २०७६ चैत ४ गते दरवाङदेखि फेदी हुँदै धारापानी खण्डको छ किलोमिटर ६०० मिटर सडक स्तरोन्नति गर्न ठेक्का सम्झौता भएको थियो।
१४ करोड ३८ लाख ६७ हजार रुपैयाँमा २०७८ असारमा सम्पन्न गर्ने लक्ष्यसहित धुलिखेल-ब्राइट-कुँवर जेभीले पूर्वाधार विकास कार्यालय म्याग्दीसँग ठेक्का लिएको आयोजनाको ४६ प्रतिशत भौतिक प्रगति भएको अवस्थामा सहायक निर्माण व्यवसायीले काम छाडेपछि करिब एक वर्ष अलपत्र परेको थियो।
२०७९ को भदौमा कार्यक्षेत्रमा आएको मुख्य निर्माण कम्पनीका कर्मचारी हरिप्रसाद हुमागाईंले हाल ९३ प्रतिशत भौतिक प्रगति भएको सडक आयोजना कार्यालयलाई हस्तान्तरणको तयारी गरेको बताए। ‘दरवाङदेखि धारापानीसम्म ६ किलोमिटर सडक फराकिलो, नाली र पर्खाल बनाएर ग्राभेल गरेका छौं,’ उनले भने ‘बादिकाको अप्ठ्यारो र साँघुरो भीरमा ३२४ मिटर सडक ढलान भएको छ।’
३.५ तीनदेखि ४ मिटर फराकिलो रहेको सडक सरदर ७.५ मिटरका दरले फराकिलो बनाइएको छ। ग्रेड नमिलेको ठाउँमा ४०० मिटर नयाँ मार्ग खोलिएको पूर्वाधार विकास कार्यालय म्याग्दीका सूचना अधिकारी अर्जुन शर्माले बताए। ‘बादिका भिरमा साँघुरो र उकालो सडक भएका कारण दुर्घटनाको जोखिम थियो,’ उनले भने ‘सडक फराकिलो, ढलान र ग्राभेल गरेका छौं। उकालो र भिरालो सडकमा गाडी बिग्रिने, दुर्घटना हुने, फस्ने, उक्लन नसक्ने समस्या हटेको छ।’
यो सडकलाई प्रदेश सरकारले चालू आर्थिक वर्षमा ५ करोड रुपैयाँ बजेट विनियोजन गरेको छ। यसलाई मुना हुँदै ढोरपाटन र पूर्वी रुकुमसँग जोडेर मध्य पहाडी लोकमार्गको वैकल्पिक मार्गका रूपमा विकास गर्न जोड दिइएको म्याग्दी प्रदेशसभा क्षेत्र (ख)बाट निर्वाचित प्रदेशसभा सदस्य तथा प्रदेश सरकारका भौतिक पूर्वाधार विकास तथा यातायात व्यवस्था मन्त्री रेशमबहादुर जुग्जालीले बताए।
‘धारापानीदेखि ताकम हुँदै सिवाङ जोड्ने चार किलोमिटर सडक कालोपत्रेसहित स्तरोन्नति गर्न प्रदेश सरकारले चालू आर्थिक वर्षमा पाँच करोड रुपैयाँ विनियोजन गरेको छ,’ उनले भने ‘सो सडक योजनालाई २५ करोड रुपैयाँको बजेटको स्रोत सुनिश्चतता गरेर बहुवर्षीय ठेक्का आह्वान भइसकेको छ।’
प्रतिक्रिया दिनुहोस !
