नेपाल एयरलाइन्सले सिमकोट-सुर्खेत परीक्षण उडान भर्ने
![नेपाल एयरलाइन्सले सिमकोट-सुर्खेत परीक्षण उडान भर्ने](https://annapurnapost.prixacdn.net/media/albums/nepal-airline-biman-gulmi_dK5s4Z1mNj_voX9PX8Jki.jpg)
सिमकोट (हुम्ला) : नेपाल एयरलाइन्सले सिमकोट-सुर्खेत रुटमा परीक्षण उडान गर्ने भएको छ । फागुन ७ गतेदेखि उक्त रुटमा उडान भर्ने नेपाल एयरलाइन्सले जनाएको छ। यसअघि नेपालगञ्ज-सिमकोट-नेपालगञ्ज रुटमा उडान गर्दै आएको एयरलाइन्सले कर्णाली प्रदेशको राजधानी सुर्खेत जोड्ने गरी सिमकोटबाट परीक्षण उडान गर्ने भएको नेपाल एयरलाइन्स सिमकोट स्टेशनका प्रमुख छिरिङ लामाले जानकारी दिए।
यसका लागि सबै तयारी पूरा भएको उनको भनाइ छ ।
'नेपाल एयरलाइन्सको जहाजले नेपालगञ्ज-सिमकोटमा उडान गरेपछि सोही दिन सिमकोट-सुर्खेत परीक्षण उडान हुनेछ”, उनले भने,'यसपछि सुर्खेत-सिमकोटका लागि यात्रुसहितको उडान भर्ने तालिकाको तयारी भइरहेको छ ।'यद्यपि अझै भाडा कति निर्धारण भने भइसकेको छैन ।
सिमकोट-सुर्खेत हवाई उडान हुने भएपछि हुम्लाबासीलाई सहज हुने भएको स्थानीय गोर्ख रोकायाले बताए। 'सिमकोट-सुर्खेत उडान सुरु भएपछि हुम्लाबाट नेपालगञ्ज र नेपालगञ्जबाट सुर्खेत जानुपर्ने बाध्यता हट्नेछ”, उनले भने।
सिमकोटबाट नेपालगञ्ज जान जहाजमा ४५ मिनेट लाग्छ भने नेपालगञ्बाट सुर्खेत पुग्न चार घण्टा लाग्छ । अब सिधै प्रदेश राजधानी सुर्खेत पुग्न नियमित उडान भए ३५ मिनेट पुग्न सकिने रोकायाको भनाइ छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)