काठमाडौं : हाल नेपालमा पश्चिमी वायुको आंशिक प्रभावको रहेको छ। देशको पहाडी भू-भागमा आंशिक बदली रही बाँकी भू-भागमा मौसम मुख्यतया सफा रहेको र तराइका केही स्थानमा हल्का हुस्सु लागिरहेको मौसम पूर्वानुमान महाशाखाले जनाएको छ।
आज कोशी, बागमती र गण्डकी प्रदेशको पहाडी भू-भागमा आंशिक बदली हुने र कोशी र गण्डकी प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको महाशाखाको बुलेटीनमा जनाइएको छ।
आइतबार कोशी, गण्डकी, कर्णाली र सुदूरपश्चिम प्रदेशको पहाडी भू-भागका एक-दुई स्थानमा फाटफुट देखि हल्का वर्षाको संभावना रहेको छ। कोशी, गण्डकी, कर्णाली र सुदूरपश्चिम प्रदेशको उच्च पहाडी तथा हिमाली भू-भागका थोरै स्थानहरूमा र बाँकी उच्च पहाडी तथा हिमाली भू-भागका एक- दुई स्थानमा हल्का हिमपातको सम्भावना रहेको छ।
सोमबार सुदूरपश्चिम प्रदेश लगायत देशको पहाडी भू-भागमा थोरै स्थानमा हल्का वर्षाको संभावना रहेको छ। देशको उच्च पहाडी तथा हिमाली भू-भागका केही स्थानहरूमा र बाँकी उच्च पहाडी तथा हिमाली भू-भागका एक- दुई स्थानमा हल्का हिमपातको सम्भावना रहेको महाशाखाले जनाएको छ।
त्यस्तै यो साताभरि नै पश्चिमी वायुको प्रभाव रहने भएकोले कर्णाली र सुदूरपश्चिम प्रदेशको हिमाली भू-भागमा साताको मध्य र अन्त्यमा केही स्थानहरूमा हल्का देखि मध्यम वर्षा/हिमपातको सम्भावना रहेको छ ।
'कर्णाली र सुदूरपश्चिम प्रदेशको पहाडी भू-भागमा साताको मध्य र अन्त्यमा थोरै स्थानमा हल्का देखि मध्यम वर्षा/हिमपातको सम्भावना रहेको छ । साताको अन्त्यमा पश्चिम तराईका केही स्थानहरुमा तथा मध्य र पूर्वी तराईका थोरै भू-भागमा फाटफुट देखि हल्का बर्षा सम्भावना रहेको छ। ', महाशाखाको बुलेटिनमा जनाइएको छ,'कोशी र बागमती प्रदेशको हिमाली भू-भागमा साताको शुरु र मध्यमा एक-दुई स्थानमा हल्का हिमपात तथा अन्त्यमा थोरै स्थानहरूमा हल्का देखि मध्यम वर्षा/हिमपात रहेको छ।'
त्यस्तै तराई भू-भागका थोरै स्थानहरूमा हल्का हुस्सु/हल्का कुहिरो लाग्ने तर उक्त हुस्सु/कुहिरो मध्यान्न सम्ममा क्रमिक रूपमा सुधार हुँदै जाने छ । यस सातामा औसतको तुलनामा बढी वर्षा तथा हिमपात हुने सम्भावना रहेको महाशाखाले जनाएको छ ।
प्रतिक्रिया दिनुहोस !
