ढल्केवर(धनुषा) : प्रथम मदन भण्डारी कप महिला राष्ट्रिय हक्की प्रतियोगिता धनुषामा सोमबारबाट सुरु हुने भएको छ। मदन भण्डारी स्पोर्टस् एकेडेमीको आयोजनामा उक्त प्रतियोगिता सुरु हुन लागेको हो। फागुन १९ गतेसम्म चल्ने प्रतियोगिता धनुषाको महेन्द्रनगरस्थित क्षीरेश्वर जनता माध्यमिक विद्यालयको खेल मैदानमा हुने मदन भण्डारी स्पोर्टस् एकेडेमीका अध्यक्ष ध्रुव आचार्यले जानकारी दिए।
आइतबार महेन्द्रनगरमा पत्रकार सम्मेलनको आयोजना गरी एकेडेमीका अध्यक्ष आचार्यले प्रतियोगिताको सम्पूर्ण तयारी पूरा भएको बताए। उनले प्रतियोगिताको उद्घाटन पूर्वराष्ट्रपति विद्यादेवी भण्डारीले गर्ने कार्यक्रम रहेको बताए।
प्रतियोगितामा कर्णाली बाहेक ६ वटा प्रदेश, विभागीय टोली त्रिभुवन आर्मी क्लब र एउटा आयोजक मदन भण्डारी स्पोर्टस् एकेडेमीका टोली गरी ८ वटा टिमको सहभागिता रहने बताइएको छ।
प्रतियोगितामा प्रथम हुने टिमलाई १ लाख ५० हजार, द्वितीय टिमलाई १ लाख र तृतीय हुने टिमलाई ५० हजार नगद पुरस्कार प्रदान गरिने अध्यक्ष आचार्यले बताए। प्रतियोगिता सम्पन्न गर्न ५६ लाख १३ हजार रुपैयाँ खर्च हुने अनुमान गरिएको उनले सुनाए।
प्रतिक्रिया दिनुहोस !
