धनकुटा : साँगुरीगढी गाउँपालिका-१ मा जारी दोस्रो वडाध्यक्ष कप आमिन्त्रत फुटबल प्रतियोगिताको उपाधि वडा नम्बर ५ डाँडाबजारले जितेको छ।
सोमबार संजिवनी खेलमैदान (सुलिकोट)मा सम्पन्न फाइनल खेलमा वडा नम्बर ७ महाभारतलाई शून्यका विरुद्ध तीन गोलअन्तरले पराजित गर्दै डाँडाबजारले उपाधि जितेको हो। उपाधिसँगै डाँडाबजारले नगद ५० हजार रुपैयाँसहित ट्रफी प्राप्त गरेको छ।
त्यस्तै उपविजेता वनेको महाभारतले नगद २५ हजार रुपैयाँसहित ट्रफीमा चित्त बुझाएको छ। डाँडाबजारको जितमा योगेश लिम्बू, विपिन लिम्बू र रुपेश याखाले एक/एक गोल गरेका थिए।
प्रतियोगिताको सर्वोत्कृष्ट खेलाडी डाँडाबजारमा विपिन लिम्बू घोषित हुँदै नगद सहित ट्रफी प्राप्त गरे। त्यस्तै डाँडाबजारका दिपन याखा उत्कृष्ट गोलकिपर घोषित भए। प्रतियोगिताभर ७/७ गोल गरेका महाभारतका विपिन लिम्बू र वुढिमोरङका पुजन लिम्बूले सर्वाधिक गोलकर्ताको पुरस्कार जित्न सफल भए।
साँगुरीगढी गाउँपालिका १ नम्बर वडा कार्यालयको सहयोगमा तथा संजीवनी क्लबको आयोजनामा गत फागुन १२ गतेदेखि प्रतियोगिता सुरु भएको थियो। प्रतियोगितामा हरेक वडाबाट एक/एक गरी कुल १० टीमको सहभागिता रहेको थियो।
प्रतिक्रिया दिनुहोस !
