सिन्धुली : जिल्लाको कमलामाई नगरपालिकाले आयोजना गरेको मेयर–उपमेयर कप खेलकुद प्रतियोगिता २०८० को उपाधी कमलामाई नगरपालिका वडा नम्बर ५ ले जितेको छ । ‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ कमलामाई नगर खेलकुद विकास समितिद्धारा आयोजित फुटबल प्रतियोगिताको उपाधि वडा नम्बर ५ ले वडा नम्बर १० लाई पछि पार्दै जितेको हो ।
प्रतियोगिताको फाइनल खेलमा कमलामाई नगरपालिका ५ ले वडा नम्बर १० लाई १–० गोलको अन्तरले हराउँदै उपाधी हात पार्न सफल भएको हो । प्रतियोगिताको विजयी वडा नम्बर ५ ले नगद ४० हजार रुपैयाँ सहित शिल्ड, मेडल र प्रमाण पत्र पाएको छ ।
दोस्रो हाफमा कनपा १० का खेलाडीले फल गरेपछि पेनाल्टी पाएको वडा नम्बर ५ का लागि रवि मतहराले निर्णायक गोल गरेका थिए । यस्तै उप विजेता कमलामाई १० ले नगर २० हजार सहित शिल्ड, मेडल र प्रमाण पत्र पाएको छ ।सेमिफाइनल खेलमा वडा नम्बर १ लाई हराउँदै वडा नं १० फाइनलमा पुगेको थियो ।
यही चैत्र ५ गतेदेखि सुरू भएको फुटबल प्रतियोगितामा नगरका १३ वटा वडाले सहभागिता जनाएका थिए । वडा नम्बर ५ यस अघिको प्रतियोगिताको समेत विजयी हो । मेयर–उपमेयर कप खेलकुद प्रतियोगितामा लगातार दोस्रो पटक पनि विजयी भएपछि वडा अध्यक्ष पूर्ण बहादुर खड्काले भएपछि खेलाडीहरूलाई प्रसंशासहित धन्यवाद व्यक्त गरेका छन्।
नगर खेलकुद विकास समितिका अध्यक्ष लोक विक्रम थापाको अध्यक्षतामा भएको फाइनल प्रतियोगितामा नगरपालिकाका मेयर उपेन्द्र पोखरेल,उपप्रमुख मन्जु देबकोटा लगायत वडा अध्यक्षहरूको सहभागिता रहेको थियो ।
प्रतिक्रिया दिनुहोस !
