काठमाडौं : दाङको बेला गाउँविकास समित-२ मा रहेको जनज्योति माध्यमिक विद्यालयका तत्कालीन लेखापाल चुडामणि पोख्रेल र विद्यालय व्यवस्थापन समितिका तत्कालीन अध्यक्ष जगदिश चौधरीविरुद्ध भ्रष्टाचार मुद्दा दायर भएको छ।
अख्तियार दुरूपयोग अनुसन्धान आयोगले शैक्षिक सत्र २०७२ र २०७३ मा विद्यालयमा अध्ययनरत विद्यार्थीहरूबाट निजी स्रोत शिक्षकलाई तबल खुवाउने बहनामा विभिन्न शीर्षकमा चर्को शुल्क लिइ अनियमितता गरेको पुष्टि हुन आएपछि तत्कालीन लेखापाल पोख्रेल र अध्यक्ष चौधरीविरुद्ध आज विशेष अदालत काठमाडौंमा भ्रष्टाचार मु्द्दा दायर गरेको हो।
अख्तियारका प्रवक्ता नरहरि घिमिरेले तत्कालीन लेखापाल पोख्रेलले आर्थिक वर्ष २०७२/०७३ मा लेखा श्रेस्ता दुरूस्त नराखेको,रसिदको प्रयोग नगरी रकम लिएको,विद्यार्थीबाट उठाएको रकम मनोमानी खर्च गरेको पुष्टि हुन आएको जानकारी दिए।
लेखापाल पोख्रेलविरुद्ध ८ लाख ९२ हजार ६७ रुपैयाँ विगो र विगोबमोजिम सजाय माग गरिएको अख्तियारले जनाएको छ। विद्यालय व्यवस्थापन समितिका अध्यक्ष चौधरीले आफूखुसी २ लाख २० हजार रुपैयाँको चेक काटी रकम निकासा गरेको र निकासा भएको खर्चको विवरणसमेत नराखेको पाइएको अख्तियारले जनाएको छ।
उनीविरुद्ध सोही रकम बराबरको विगो माग गरिएको छ।
प्रतिक्रिया दिनुहोस !
