गोरखा : कलेजो र पित्तथैलीको क्यान्सरसँग १३ महिना लामो लडाइँ हारेपछि श्रीमान् शंकर रोकाको गत शुक्रबार निधन भयो। पशुपति आर्यघाटमा उनको दाहसंस्कार सकेर फर्कने क्रममा शनिबार बिहान ७ बजे त्रिशूलीमा ट्याक्सी खस्दा सासू आमासहित परिवारका पाँच जनाको मृत्यु भयो।
बुबालाई दागबत्ती दिएर फर्केका एक मात्र सन्तान १८ वर्षका विवश रोका पनि सोही ट्याक्सी दुर्घटनामा परी बेपत्ता छन्। अकल्पनीय बज्रपात खेपिरहेकी परिवारकी एकमात्र जीवित सदस्य बबिता रोका अहिले काजकिरियामा छिन्। उनी शंकरकी अर्धांगिनी हुन्। ‘परिवारका सबै गुमेपछि भाउजू एक्लै बाँकी हुनुहुन्छ। उहाँ नै किरिया बस्नुभएको छ’, देवर नाता पर्ने स्थानीय विकास रोका भन्छन्, ‘किरिया बस्न हामी दाजुभाइ खलक सबै तयार थियौं, तर भाउजूले आफैं किरिया बस्छु भनेपछि अरू बोल्ने कुरै भएन। अस्ति शनिबारदेखि आजसम्म तीन दिन भयो उहाँ परम्पराअनुसार सेतो पहिरनमा किरिया बसिरहनु भएको छ।’
घरमूली शंकरका पिता दिलबहादुर रोका पनि १५ वर्षअघि दिवंगत भइसकेकाले उनको परिवारको विरासत ३६ वर्षकी बबिताले काँध थाप्नु परेको छ। दुर्घटनामा मृतक शंकरकी आमा जुनकिरी रोका, जुनकिरीकी जेठी छोरी हरिमाया उपरकोटी, हरिमायाका आठ वर्षका छोरा आगमन, कान्छी छोरी अञ्जना र ज्वाइँ अर्जुन सिर्मलको मृत्यु भएको थियो। जुनकिरीकी एक मात्र छोरा शंकर र शंकरका एक मात्र सन्तान विवश हुन्।
मृत्यु भएका पाँचै जनाको शनिबार राति रामशाहघाटमा संयुक्त दाहसंस्कार गरिएको थियो। परिवार कोही पनि बाँकी नरहेपछि उनकी सासूआमा जुनकिरीलाई देवर हरिबहादुर रोकाले दागबत्ती दिएको विकास रोकाले बताए। किरिया बस्ने क्रममा बबिता हराइरहेका छोरा विवशलाई सम्झेर भक्कानिने गर्छिन्। ‘श्रीमान् सम्झेर होला, सासूलाई सम्झेर होला। त्योभन्दा अझ छोरा हराइरहेको छ। अहिलेसम्म फेला पार्न सकिएको छैन। यस्तै-यस्तै सम्झेर होला, भाउजू बेला-बेला भक्कानिनुहुन्छ’, विकासले भने।
विवशको खोजीमा पौवाखेतका १० जनाको टोली दैनिक पालो लगाएर त्रिशूलीको किनारै किनार ओहोरदोहोर गरिरहन्छन्। ‘तीनदिन भयो खोजेको खोज्यै छौं। फेला पारेका छैनौं’, अर्का स्थानीय सागर रोका भन्छन्, ‘यसअघि यस्तै हराएका मान्छे खोजेका अनुभवीहरू चार दिनमा पाखामा उतार्छ भन्छन्, भोलि त पाइन्छ कि भन्ने आशा छ।’ पितृशोकमा रहेका विवश कक्षा १२ को परीक्षाको तयारी गरिरहेका थिए।
प्रतिक्रिया दिनुहोस !
