विराटनगर : तास खेलिरहेको अवस्थामा विराटनगरबाट प्रहरीले मंगलबार साँझ १० जनालाई पक्राउ गरेको छ।
पक्राउ पर्नेमा विराटनगर महानगरपालिका-१२ का ४० वर्षीय किसन श्रेष्ठ, ३० वर्षीय अजय मण्डल, २९ वर्षीय आर्यन कामत, ३६ वर्षीय दीपक सहनी, ६५ वर्षीय देवेन्द्रबहादुर सुब्बा, ५३ वर्षीय वेदनिधि दाहाल, विराटनगर-११ का ३५ वर्षीय दीपक सहनी, २७ वर्षीय अनिष अधिकारी, ५० वर्षीय बाबुराम कट्टेल र विराटनगर-१० का ३७ वर्षीय रामबाबु राय रहेका छन्।
वेदनिधि दाहालको घरमा तास खेलिरहेको विशेष सूचनाका आधारमा वडा प्रहरी कार्यालय विराटनगरबाट डीएसपी बुद्ध श्रेष्ठको नेतृत्वमा खटिएको टोलीले उनीहरुलाई पक्राउ गरेको हो। विराटनगर-१२ स्थित दाहालको घरमा प्रहरीले मंगलबार साँझ ५ बजेतिर छापा हानेको थियो।
पक्राउ परेकाहरुको साथबाट १ सय ५० भारतीय रुपैयाँसहित ८२ हजार ४ सय ३० रुपैयाँ नगद, १ सय ५६ पत्ती तास तथा मोबाइल बरामद भएको मोरङ प्रहरीका डीएसपी वेदप्रकाश जोशीले जानकारी दिए। उनका अनुसार पक्राउ परेकाविरुद्ध जुवा ऐनअन्तर्गतको मुद्दा चलाउने तयारी छ।
प्रतिक्रिया दिनुहोस !
