हट्यो माइतीघरको निषेधज्ञा
![हट्यो माइतीघरको निषेधज्ञा](https://annapurnapost.prixacdn.net/media/albums/mAITIGHAR_TEACHER_m1hK5WJ53m_HkUkYnN9UW.jpg)
काठमाडौं : माइतीघर मण्डलामा लगाइएको निषेधज्ञा हटेको छ। जिल्ला प्रशासन कार्यालय काठमाडौंले माइतीघर मण्डलादेखि नयाँ बानेश्वरको कृष्ण टावरसम्मको निषेधज्ञा भोलि (शनिबार)देखि हटेको जानकारी दिएको छ।
काठमाडौंका सिडिओ हरि प्रसाद शर्माले विज्ञप्ति जारी गर्दै गत फागुन ४ गतेदेखि जारी भएको निषेधज्ञा हटाइएको उल्लेख गरेका छन्।
'स्थानीय प्रशासन ऐन, २०२८ को दफा ६ को उपदफा (३क) बमोजिम मिति २०८० /११/०४ मा २(दुई) महिनासम्मका लागि पाँच जनाभन्दा बढी व्यक्ति भेला भई जुलुस, प्रदर्शन, धर्ना, घेराउ, अनसन, सभाजस्ता विरोधका कार्यक्रम गर्न निषेध गर्ने गरी काठमाडौं जिल्लाका विभिन्न स्थानलाई तोकेर निषेध आदेश जारी भएकोमा हाललाई सुरक्षा चुनौती विश्लेषण समेतका आधारमा जिल्ला सुरक्षा समिति, काठमाडौंको मिति २०८०/१२/३० को सिफारिस अनुसार माइतीघर मण्डलादेखि बानेश्वर (कृष्ण टावर) सम्मको क्षेत्रलाई मिति २०८१/०१/०१ देखि उक्त निषेध आदेश कायम नरहने व्यहोरा सम्बन्धित सबैलाई सूचित गरिन्छ,' विज्ञप्तिमा भनिएको छ।
प्रशासनले सुरक्षा चुनौती भन्दै माइतीघर मण्डला, प्रधानमन्त्री कार्यालय बालुवाटार, राष्ट्रपति कार्यालय महाराजगञ्ज आसपास निषेधज्ञा जारी गरेको थियो।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)