पैदलयात्रीलाई ठक्कर दिएको मोटरसाइकल ट्यांकरसँग ठोक्कियो, एकजनाको मृत्यु

विराटनगर : मोरङको उर्लाबारी नगरपालिकामा सडक दुर्घटनामा परी एकजनाको मृत्यु भएको छ । सोमबार राति १० बजेतिर उर्लाबारी–३ मंगलबारेमा मे.७ प.८४८० नम्बरको मोटसाइकल पैदलयात्रीलाई ठक्कर दिई अनियन्त्रित भएको थियो ।

अनियन्त्रित भएको मे.७ प.८४८० नम्बरको मोटरसाइकल विपरीत दिशाबाट जाँदै गरेको डब्लुबी ७६ बी ०१११ नम्बरको ट्यांकरसँग ठक्कर खाएको थियो । जसमा पैदल यात्री उर्लावारी–३ का ४५ वर्षीय रामकिशोर चौधरी घाइते भएका थिए । 

छाती र टाउकोमा चोट लागेका उनलाई मदन भण्डारी ट्रमा सेन्टर मंगलबारेमा सामान्य उपचारपछि थप उपचारको लागि न्युरो अस्पताल विराटनगर ल्याइएको छ । यस्तै,मोटरसाइकलमा सवार जिल्ला मोरङ कानेपोखरी गाउँपालिका–३ बस्ने सोमनाथ जोगीका छोरा १४ वर्षीय दर्पण जोगी मदन भण्डारी ट्रमा सेन्टर मंगलबारेमा उपचार भइरहेको प्रहरीले जनाएको छ ।

सोही मोटरसाइकलमा सवार सोही स्थानका ३३ वर्षीय धनबहादुर जोगीको अस्पताल पुर्‍याउना साथ डाक्टरले चेकजाँच गर्दा १०:१५ बजेतिर मृत घोषण गरेका थिए । प्रहरीले मोटरसाइकल, ट्यांकर र ट्यांकर चालक भारतको पश्चिम बंगाल सिलगुडीबस्ने ३५ वर्षीय कम्लेशकुमार सिंह नियन्त्रणमा लिई थप अनुसन्धान गरिरहेको छ ।