परासी : नवलपरासीको पाल्हीनन्दन गाउँपालिकाले पदस्थापन नगराउँदा नियुक्ति लिएर गएका स्थायी शिक्षकहरू अन्यौलमा परेका छन् । पदस्थापन ढिलाइ हुँदा उनीहरूको ‘ग्रेड’ र जागिर अविधको समयमा समेत धक्का लाग्ने देखिएको छ ।
शिक्षा सेवा आयोग पास गरेका ८६ जना प्रावि तहका शिक्षकलाई जिल्लाका विद्यालयमा पदस्थापनका लागि पठाइएको हो । जिल्लामा रहेका सात पालिकामध्ये अन्यले पदस्थापन गराइसकेका छन् । पाल्हीनन्दनमा पठाइएका १४ जना शिक्षकलाई भने बुधबारसम्म कुनै पनि विद्यालयमा पदस्थापन गराइएको छैन ।
पदस्थापन नगराउँदा उनीहरू अन्यौलमा मात्र परेका छैनन् कि जागिर अवधिको सुविधामा गणना हुने ‘ग्रेड’ र समय अवधिमा पनि समस्या हुने भन्दै चिन्तित भएका छन् । पालिका प्रमुखको राजनीतिका कारण शिक्षकहरूको पदस्थापनमा ढिलाइ भएको कर्मचारीको आरोप छ ।
यसअघि करारमा नियुक्ति गरिएका आफू निकट व्यक्तिलाई हटाउनुपर्ने भएकाले पालिका प्रमुख बैजु प्रसाद गुप्ताले ढिलाई गरेको कर्मचारीको आरोप छ । स्थायी शिक्षक गएपछि स्थानीय तहले कनिष्टका आधारमा करार शिक्षकलाई हटाउँदै पदस्थापन गराउनुपर्ने प्रावधान छ ।
पालिकामा हाल १५ जना करारका शिक्षक छन् । स्थायी भएर भएका शिक्षकलाई पदस्थापन गराउँदा १४ जना करारका शिक्षकलाई हटाउनुपर्ने भएकाले पालिका प्रमुखले आनाकानी गरेको बताइएको छ । आयोगबाट नियुक्ति लिइ आएका शिक्षकहरूको पदस्थापन गराउन चैत २६ गते शिक्षा विकास तथा समन्वय इकाएले सम्बन्धित पालिकामा पत्र पठाएको थियो ।
शिक्षा तथा मानव स्रोत विकास केन्द्रको ‘शिक्षक पदस्थापनाका आधार तथा मार्गदर्शन’ मा शिक्षा विकास समन्वय इकाईले पठाएको सात दिनभित्र सम्बन्धित स्थानीय तहहरुले पदस्थापन गराउनुपर्ने उल्लेख छ । तर, अन्य पालिकाहरूले पदस्थापन गराए पनि पाल्हीनन्दनले अहिलेसम्म नगराएको शिक्षा विकास तथा समन्वय इकाई प्रमुख पूर्णबहादुर बिश्वकर्माले बताए । शैक्षिक सत्र सुरुहुनु अघि पदस्थापन नहुँदा शिक्षकको ‘ग्रेड’मा घाटा हुने इकाई प्रमुख बिश्वकर्माले बताए ।
‘चैतमा हाजिर भएको भए अहिलेको नयाँ सत्र २०८१ देखि ग्रेड गणना हुन्थ्यो । अब बैशाखमा हाजिर हुँदा उक्त शिक्षकको २०८२ देखि ग्रेड गणना हुन्छ,'उनले भने । त्यति मात्र होइन आफूसँगै नियुक्ति लिएर आएका शिक्षकभन्दा पछि हाजिर हुँदा सेवा अवधिको दिन गणनामा पनि पछि परिने उनको भनाइ छ ।
शिक्षक पदस्थापन ढिलाइँबारे गाउँपालिकाका अध्यक्ष गुप्ताले अरु पालिकाकामा भन्दा आफ्नो पालिकामा धेरै शिक्षक पठाएकाले करारमा रहेका शिक्षकलाई हटाउन समस्या भएको बताए । ‘अरु पालिकामा थोरै पठाएको छ । हामी कहाँ धेरै संख्यामा पठाउँदा समस्या भएको छ । करारमा रहेका शिक्षकहरुलाई के गर्ने ? पदस्थापन गराउनै गाह्रो भयो,' गुप्ताले भने । केही दिनमा शिक्षा समितिको बैठक बसेर के गर्ने भन्ने विषयमा टुंगोमा पुग्ने गुप्ताको भनाइ छ ।
स्थायी शिक्षक पठाइनुअघि जिल्लाका प्रावि तह विद्यालयमा ११० जना करार शिक्षक थिए । ८६ जना स्थायी शिक्षक गएपछि अब २४ जना करारका शिक्षक मात्र रहने छन् । स्थायी शिक्षकको पदपूर्तिहुँदा रामग्राममा ८,सुनवलमा ४ र बर्दघाट नगरपालिकामा ५ जना करारका शिक्षक मात्र बाँकी रहेका छन् ।
त्यस्तै प्रतापपुरमा १, सरावलमा ५ जना करारका शिक्षक बाँकी छन् भने सुस्तामा सबै करारका शिक्षक निस्किएका छन् । जिल्लामा सबै तहको गरी कुल ३३० सामुदायिक विद्यालय छन् । जसमा १ हजार २५१ शिक्षकले ६४ हजार ५६९ विद्यार्थीहरु अध्यापन गराउँदै आएको शिक्षा समन्वय इकाईले जनाएको छ ।
प्रतिक्रिया दिनुहोस !
