गोरखा: वीरेन्द्रतालमा हिउँपहिरो खसेको कारण बूढीगण्डकीमा तीनघण्टादेखि बाढी चलिरहेको छ । बिहान पौने नौ बजेदेखि १२ बजेसम्म निरन्तर बाढी चलिरहेको स्थानीयबासीले जानकारी दिए।
'बूढीगण्डकी असार, साउनमा जत्तिकै बढिरहेको छ', चुमनुब्री ४ का कान्छा गुरुङले भने, 'तीनघण्टा भयो, उत्तिकै छ ।' नराम्रो असर भने नगरेको उनले बताए ।
चुमनुब्री १ सामागाउँस्थित वीरेन्द्रतालमा आइतबार बिहान पौने नौ बजे हिउँपहिरो गएको हो ।
वीरेन्द्रतालको ओभरफ्लोको पानीले सामागाउँबाट साम्दो जाने बाटोको काठेपुल बगाएको छ । पुल बगाउँदा साम्दो हुँदै लार्केपास गर्न जाने विदेशी पर्यटक सामागाउँमै 'होल्ड' भएका प्रहरीले जनाएको छ । पानीको बहाव कम भएपछि वैकल्पिक पुल राखेर पर्यटकलाई पास गरिने बताइएको छ । बर्सेनी सो काठेपुल बगाउँदा स्थानीयबासी र पर्यटकले हैरानी खेपिरहनु परेको छ । उपयुक्त ठाउँमा पक्कीपुल (झोलुंगेपुल) बनाउन जरुरी रहेको वडाअध्यक्ष कर्मा छेवाङ लामाले जानकारी दिए ।
प्रतिक्रिया दिनुहोस !
