सर्वोच्चले सोध्यो सोडारीलाई मुख्यमन्त्री नियुक्ति गर्नुको कारण

काठमाडौं : सुदूरपश्चिम प्रदेशका मुख्यमन्त्री दीर्घ सोडारीको नियुक्त बदर गर्नुपर्ने मागसहित दायर भएको रिटमा सर्वोच्च अदालतले कारण देखाउ आदेश जारी गरेको छ। 

न्यायाधीश बालकृष्ण ढकालको एकल इजलासले मुख्यमन्त्री नियुक्तिको सक्कलप्रति निर्णयसहित जवाफ पेश गर्न आदेश दिएको हो। त्यस्तै मुद्दालाई अग्राधिकार प्रदान गर्दै वैशाख २३ गतेका लागि पेसी तोकिएको छ।

नागरिक उन्मुक्ति पार्टीका नेता लक्ष्मण किशोर चौधरीले सोडारीलाई गैरसंवैधानिक तरिकाले मुख्यमन्त्रीमा नियुक्त गरेको भन्दै बदर गर्न माग गरेका थिए। 

निवेदनमा भनिएको छ, ‘प्रस्तुत रिट निवेदनको अन्तिम किनारा लाग्दा उपरोक्त अनुसारको उपचार पाउने भए पनि तत्काल विपक्षिहरुको गैरसंवैधानिक कार्य रोक नलागाउने हो भने निवेदकको हकको हनन गर्ने क्रियालाई विपक्षीले थप चर्काउन सक्ने हुदा तत्कालिक न्याय, अपुरणीय क्षति, सुविधा र सन्तुलनको सिद्धान्त, यस सम्मानित अदालतबाट यस अघि अवलम्वन गरी आएको न्यायिक पद्दतिको अनुसरण एवम सर्वोच्च अदालत नियामावलि, २०७४ को नियम ४९ समेत वमोजिम विपक्षिको मिति २०८१-०१-०४ का दिन प्रकाशित गरिएको विज्ञप्ति सूचना मुख्यमन्त्री पदमा नियुक्त गर्ने गरेको निर्णय कामकारबाही तत्काल कार्यान्वयन नगर्नु नगरउनु पुर्वावस्था कायम गरी मलाई नियुक्त गर्न भनी अन्तरिम आदेश जारी गरिपाउँ। साथै प्रस्तुत विषय निरन्तर सुनुवाईमा राखि शिघ्र निरुपण पूर्वावस्था कायम गरी मलाई नियुक्त गरिपाउँ।’