बुटवल : प्यूठानका विभिन्न खोलाहरूमा ८ वटा मोटरेबल पक्की पुल निर्माण भएका छन् । सडक पूर्वाधार विकास कार्यालय प्यूठानले कार्यालय स्थापना भएपछिको अवधिमा हालसम्म उक्त पुलहरू निर्माण गरेको हो । सबै पुल सम्पन्न भइसकेका छन् । योजना सम्पन्न गर्नका लागि कूल २५ करोड ४३ लाख रुपैयाँ बजेट खर्च भएको कार्यालयका प्रमुख बरिष्ठ इन्जिनियर चन्द्र शाहले जानकारी दिए ।
गौमुखी गाउँपालिकाको ठूलाबेसी–पूँजा सडक खण्डअन्तर्गत झिमरुक खोला (मसानघाट) मा ५ करोड ६६ लाख रुपैयाँमा ७० मिटरको पक्की पुल निर्माण गरिएको छ । ऐरावतीस्थित चेरनेटा–पुरनठाँटी–जोगीटारी सडकको हरियाखोलामा दुई करोड ५५ लाख रुपैयाँ लगानीमा २५ मिटरको पुल निर्माण भएको कार्यालय प्रमुख शाहले बताए ।
कुमालटार–कोन्द्राचौर–आँपचौर–कोचिवाङ–स्वर्गद्धारी सडकको कुसुण्डे खेलामा एक करोड ७१ लाख,चेरनेटा–सालघारी–सोत्रेसारी–डाँडागाउँस्थित दाखाखोला (भालुखोला) मा एक करोड ९९ लाख, दाखाक्वाडी–बर्जिवाङ–भिंगृ सडक खण्ड अन्तर्गत चितिखोलामा एक रोड ५४ लाख रुपैयाँ लगानीमा पुल निर्माण गरिएको छ । चितिखोलाको पुल निर्माणको अन्तिम चरणमा रहेको शाहले जानकारी गराए ।
त्यस्तै,झिमरुक गाउँपालिकास्थित ढाँडा–गोब्दी–टिमुरचौर–दिहाल्ना सडक खण्डको गोब्दी खोलामा चार करोड ७९ लाख लगानीमा पुल निर्माण पुरा भएपनि मन्त्रालयले बजेट नपठाउँदा निर्माण व्यवसायीलाई भूक्तानी दिन नसकिएको कार्यालयले जनाएको छ ।
दाखाक्वाडी–बर्जिवाङ–भिंगृ सडक खण्डको दँगाल खोलामा तीन करोड ६५ लाख र झिमरुक गाउँपालिकाको झिमरुक खोलास्थित ढाँड–तुषारा सडक खण्डामा तीन करोड ५४ लाख लगानीमा पुल निर्माण सम्पन्न भएको छ ।
पुल बनेपछि जिल्लाका सबैजसो स्थानीय तहका नागरिकहरू प्रत्यक्ष लाभान्वित भएका छन् । आगामी आर्थिक वर्षका लागि पनि दर्जन संख्यामा केही महत्वपूर्ण पक्की पुलहरुको निर्माणका लागि कार्यालयले मन्त्रालयमा योजना पेश गरेको शाहले बताए ।
प्रतिक्रिया दिनुहोस !
