थाइल्यान्डमा यस वर्षको अहिलेसम्म अत्यधिक गर्मीले ६१ जनाको ज्यान लिएको छ । यो २०२३ को तुलनामा धेरै तातो भएको जनाउँदै स्वास्थ्य मन्त्रालयले सम्पूर्ण क्षेत्रमा यो सातासम्म अत्यधिक गर्मी भएको बताएको छ ।
हालैका साताहरूमा थाइल्यान्डमा असाधारण तातो मौसमको लहरको दैनिक चेतावनी जारी गर्नुपरेको अधिकारीहरुले जनाएका छन्।
स्वास्थ्य मन्त्रालयले शुक्रबार सन् २०२४ को सुरुदेखि गर्मीका कारण ६१ जनाको मृत्यु भएको बताएको छ । सन् २०२३ मा ३७ जनाको मृत्यु भएको थियो । थाइल्यान्डको उत्तरपूर्वी कृषिप्रधान क्षेत्रमा गर्मीका कारण सबैभन्दा धेरै मृत्यु भएको मन्त्रालयले जनाएको छ ।
वैज्ञानिकहरूले लामो समयदेखि मानव–प्रेरित जलवायु परिवर्तनले बारम्बार, लामो र अधिक तीव्र तातो छालहरू उत्पादन गर्ने चेतावनी दिएका छन् ।
संयुक्त राष्ट्रसङ्घको मौसम विज्ञान सङ्गठनका अनुसार अल निनोको घटनाले यस वर्षको असाधारण गर्मीको मौसमलाई ल्याउन सहयोग गरिरहेको छ । एसिया महादेश औसतभन्दा तीव्र गतिमा तातो भइरहेको छ ।
थाइल्यान्डको रोग नियन्त्रण विभागका सहायक अपिचार्ट वाचिराफानले बिरामी मानिसहरुलाई बाहिर निस्कने समय सीमित गर्न चेतावनी दिएको छ।
यस वर्ष राज्यले मनसुन आगमनमा ढिलाइ अनुभव भएको पनि जनाइएको छ। यस हप्ता राज्यका केही भागमा आँधीबेहरी आउँदा तापक्रम कम भए पनि सम्भावित बाढीको चेतावनी दिइएको छ।
प्रतिक्रिया दिनुहोस !
