जसपा नेपाल छाडेका सांसदलाई प्रधानमन्त्रीलाई विश्वासको मत दिनबाट रोक्न सर्वोच्च पुगे उपेन्द्र

काठमाडौं : प्रधानमन्त्री पुष्पकमल दाहाल 'प्रचण्ड'ले सोमबार लिन लागेको विश्वासको मत दिनबाट रोक्न जनता समाजवादी पार्टी नेपालका अध्यक्ष उपेन्द्र यादव सर्वोच्च अदालत पुगेका छन्। जसपा नेपालबाट फुटेर दर्ता भएको अशोक राई नेतृत्वको जसपाका सातजना सांसदलाई प्रधानमन्त्री 'प्रचण्ड' लाई विश्वासको मत दिनबाट रोक्न यादव सर्वोच्च पुगेका हुन्।

यादवले दिएको रिट दर्ता भइसकेको सर्वोच्च अदालतका सूचना अधिकारी गोविन्दप्रसाद घिमिरेले जानकारी दिए। उनका अनुसार भोलिका लागि पेशी तोकिएको छ।

यसअघि सर्वोच्च अदालतले अशोक राई नेतृत्वको जसपालाई यथास्थितिमा राख्न अल्पकालीन अन्तरिम आदेश जारी गरेको थियो। जसपा नेपालका प्रवक्ता मनिष सुमनले सर्वोच्चको यसअघिको आदेशअनुसार रिट दायर गरेको जानकारी दिए।

जसपामा अध्यक्ष राईसहित सुशीला श्रेष्ठ, नवलकिशोर साह, प्रदीप यादव, रञ्जु झा, वीरेन्द्र महतो र हसिना खान सांसद छन्।

जसपा नेपालबाट फुटेर दर्ता भएको जसपा निर्णय यथास्थितिमा राख्न दिएको अल्पकालीन अन्तरिम आदेश कार्यान्वयनको माग गर्दै उनी सर्वोच्च पुगेका हुन्। प्रधानमन्त्री प्रचण्डले भोलि विश्वासको मत लिनका लागि व्यवस्था मिलाउन संसद सचिवालयमा पत्राचार गरेका छन्। 

यादव नेतृत्वको जसपा नेपालबाट छुट्टिएर ७ जना सांसदले २०८१ साल वैशाख २३ गते छुट्टै दल दर्ता गराएका थिए। निर्वाचन आयोगले सो दललाई वैशाख २४ गते दर्ता गरेको थियो। आयोगको निर्णयविरुद्ध यादवले सर्वोच्चमा रिट दायर गरेका थिए। 

राई नेतृत्वको जसपा प्रचण्ड नेतृत्वको सरकारमा सहभागी भएको छ। जसपाबाट  प्रदीप यादव स्वास्थ्य मन्त्री, नवलकिशोर  साह सुडी वनमन्त्री र हसिना खान राज्यमन्त्री छन्।