बजेटबारे कर्णाली प्रदेशका मुख्यमन्त्री कँडेलले गरे निजी क्षेत्रका व्यवसायीसँग छलफल

वीरेन्द्रनगर : कर्णाली प्रदेशका मुख्यमन्त्री यामलाल कँडेलले आगामी आर्थिक वर्षको नीति तथा कार्यक्रम र बजेटका सन्दर्भमा कर्णालीका निजी क्षेत्रका उद्योगी तथा व्यवसायीहरूसँग छलफल गरेका छन् । मुख्यमन्त्री कँडेलले कर्णालीको विकास,निर्माण,रोजगारी पर्यटनका क्षेत्रमा नीजि क्षेत्रको महत्वपूर्ण भूमिका रहेको भन्दै निजि क्षेत्रका उद्योगी तथा व्यवसायीसँग मंगलबार छलफल गरेका हुन् ।

कर्णालीको विकासका लागि निजी क्षेत्रको महत्वपूर्ण भूमिका रहेको त्यसका लागि यहाँका उद्योगी तथा व्यवसायीको सुझाव लिन नीजि क्षेत्रका उद्योगी तथा व्यवसायीसँग छलफल गरिएको उनले बताए । मुख्यमन्त्री कँडेलले सरकारले ल्याउने विकास निर्माणमा अपनत्वको भावना नभए त्यसले सार्थकता नपाउने बताए । 

उनले नीजि क्षेत्र सवल नबन्दासम्म देशको विकास पनि नहुने भएकाले प्रदेश सरकारले नीजि क्षेत्रसँग मिलेर काम गर्ने उल्लेख गरे । 'देशको विकास लागि निजि क्षेत्रको पनि महत्वपूर्ण भूमिका रहेको छ । कर्णालीको विकास हामी केन्द्र सरकारसँग चार–पाँच वटा माग राखेको छौं,'उनले भने।

यस्तै, सुर्खेत उद्योग वाणिज्य संघका अध्यक्ष लक्ष्मण कँडेलले सुर्खेत विमानस्थलको स्तरउन्नती गर्नुपर्ने, सुब्बाकुनादेखि बांगेसिमलसम्मको बाटो चार लेनबाट छ लेनको बनाउनुपर्ने,सुर्खेत वीरेन्द्रनगर बजारलाई स्मार्ट सिटी बनाउनु पर्ने बताए । 

उद्योग वाणिज्य संघ कर्णाली प्रदेशका अध्यक्ष पदमबहादुर शाहीले कर्णालीको विकासका लागि विगतदेखि नै आफूहरूले प्रदेश सरकारलाई सुझाव दिँदै आएको र अहिले पनि कर्णालीको विकासका लागि मुख्यमन्त्री समक्ष आफ्ना माग राखिएको बताए । 

नेपाल च्याम्बर अफ कमर्सका चिन्तामणी शर्माले कर्णालीमा अहिले पर्यटन लगायतका क्षेत्रको प्रचुर सम्भावना भएकाले त्यसका लागि भारत लगायतका देशमा कर्णालीको पर्यटन क्षेत्रको प्रसारप्रचार आवश्यक रहेको बताए ।