पर्सा : के छैन मधेससँग ? पर्यटकले खोज्ने र घुम्न चाहने जानकी मन्दिर, छिन्नमस्ता भगवती, गढीमाईजस्ता सयौं ऐतिहासिक तथा धार्मिक मठमन्दिर छन् ।
पर्यटकलाई लोभ्याउने थरीथरीका संस्कृति अनि प्राकृतिक चुरे छटा र पहाड पर्वत छन् । हेर्दै जिब्रो रसाउने थरीथरीका परिकार चाख्न पाइन्छ । तर, मधेसको वैभव र निधि गुमनाम जस्तै छ । यसैलाई प्रचारप्रसार गर्न ‘घुम्न आउनूस् मधेस’ भन्ने अभियान थालिएको छ । स्थानीय स्तरबाट बाराको पर्सा राष्ट्रिय निकुञ्जबाट मधेसलाई चिनाउने अभियानको थालनी हो ।
आइतबार पर्सामा अन्तर्क्रिया तथा भ्रमण कार्यक्रमको आयोजना गर्दै होटल तथा पर्यटन व्यवसायी महासंघ मधेस प्रदेशले अभियानको सुरुवात गरेको अध्यक्ष हिरा गौतमले जानकारी दिए । ‘मधेसमा किन पर्यटक आउने, केका लागि आउने ? के छ त मधेससँग ?’ यसको प्रश्नको उत्तर दिँदै उनले भने,‘विश्वका पर्यटकलाई मधेस घुम्न निमन्त्रणा गर्न थालेका छौं । यसलाई अभियानकै रूपमा अघि बढाएका छौं ।’
मधेस प्रदेशमा आएका बाह्य तथा आन्तरिक पर्यटकलाई बस्न सानादेखि पाँचतारे होटल खुलेको उनले बताए । मधेस प्रदेशमा १ हजार ५ सयभन्दा बढी होटल, रेस्टुराँ छन् ।
अभियानले मधेसका पुरातात्विक, ऐतिहासिक, धार्मिक, मठमन्दिर तथा प्राकृति सौन्दर्यको संरक्षण, सम्बद्र्धन र विकासका लागि बहस–पैरवी गरिरहेको छ । अन्नपूर्ण पोस्ट्ले देशभरिका एक हजार पर्यटन क्षेत्रबारे प्रकाशन गरेको खोजमूलक सामग्रीले अभियनमा निकै सहयोग गरेको महासंघका अध्यक्ष गौतमले जनाए ।
महासंघले पहिलो चरणमा मधेस प्रदेशमा आठवटै जिल्लाका ५/५ धार्मिक तथा प्राकृतिक स्थलको संरक्षण, सम्बद्र्धन र विकासका लागि अभियान चलाइएको छ ।
महोत्तरीका जलेश्वरनाथ महादेव मन्दिर, रौजा मजार, टुटेश्वर महादेव मन्दिर, पञ्चधुरामाई मन्दिर र कालापानी पार्क (उद्यान) छनौट गरिएको छ । सप्तरीको कंकालिनी माई मन्दिर, सकरा भगवती, सिरहाका सहलेस फूलबारी, उत्तरायणी कमला सूचीमा छन् । त्यसैगरी धनुषाका धनुषाधाम, सर्लाहीका बागमती ताल र सागरनाथ वन विकास परियोजना, चन्द्रनगरस्थित नाढीमन ताल, रौतहटका नुनथर र जंगे झरना, बाराको गढीमाई मन्दिर र आधिभारस्थित पर्सा राष्ट्रिय निकुञ्ज र पर्साका भिसवाडाँडा र शंकराचार्यद्वार लगायतका स्थान छन् ।
पर्यटकलाई खानाले नै लोभ्याउँछ । मधेसको रैथाने खाना र खाजाको स्वाद चखाउनका लागि सडक खाना महोत्सव पनि आयोजन गरिँदै आएको छ । महोत्तरीबाट सडक खाना महोत्सव सुरु गरिएको थियो भने बाराबाट घुम्न आउनु भन्ने अभियान सुरु गरिएको हो ।
प्रतिक्रिया दिनुहोस !
