गोरखा : गोरखाकी नाङ्सल छोदेन लामाले २२ घण्टामा विश्वको सर्वोच्च शिखर सगरमाथा र चौथो अग्लो हिमाल ल्होत्से एकसाथ आरोहण गरेकी छन् । अघिल्लो वर्ष ८,१६३ मिटर अग्लो मनास्लु आरोहण गरेकी चुमनुब्री १ सामागाउँकी नाङ्सलले पहिलो पटक एकैसाथ दुवै हिमाल आरोहण गरेकी हुन् ।
पहिलो प्रयासमै सर्वोच्च शिखर सगरमाथा २२ घण्टा १५ मिनेटमा पुग्न सफल भएकी उनले त्यसको लगत्तै ८,५१६ मिटर अग्लो ल्होत्सेको आरोहण गरेकी हुन् । दुवै हिमाल आरोहण गरेर ४७ घण्टामा बेसक्याम्प आइपुगेको उनको भनाइ छ ।
बिहान चारबजे बेसक्याम्पबाट हिँडेकी उनले भोलिपल्ट बिहान २:१५ मा सगरमाथाको शिखरमा पाइला टेकेकी थिइन् । त्यहाँबाट चौथो क्याम्पमा झरेर फेरि ल्होत्सेको आरोहण गरेर ४७ घण्टामा बेसक्याम्पमा आएको उनको भनाइ छ । उनी अहिले बेसक्याम्पमै छिन् ।
यसअघि सबैभन्दा छिटो १४ घण्टा ३१ मिनेटमा सगरमाथा आरोहण गरेर गोरखा छेकम्पारकी फुञ्जो झाङ्मु लामाले विश्व किर्तिमान राखेकी छन् । साथै यात्रा सुरु गरेको २४ घण्टा २६ मिनेटमा बेसक्याम्पमै फर्केर सबैभन्दा छिटो बेसक्याम्प फर्कने महिलाका रुपमा किर्तिमान कायम गरेकी छन् ।
उनीपछि दोस्रो छिटो आरोहण गर्ने महिला नाङ्साल छोदेन बनेकी छिन् । फुञ्जोभन्दा अघि सन् २०२१ मा हङकङकी स्याङ यिन हङ(आडा)ले २५ घण्टा ५० मिनेटमा आरोहण गरेर गिनिज बुक अफ वर्ल्ड रेकर्डमा नाम लेखाएकी थिइन् । अहिले नाङ्सालले आडाको रेकर्डभन्दा ३ घण्टा छिटो आरोहण गरेकी हुन् ।
चुमनुब्री सामागाउँ गोरखाकी नाङ्सालले चुमनुब्रीका युवाहरुलाई हिमाल आरोहण क्षेत्रमा अघि बढ्न उत्साह बढाउनका लागि सगरमाथा आरोहण गरेको बताएकी छन् । आफ्नो गाउँमै मनास्लु हिमाल रहेपनि आरोहण क्षेत्रमा युवाहरु नलागी बेरोजगार भएर बसेकाले यस क्षेत्रमा लागेर स्वरोजगार हुन हौसला दिन आफू हिमाल चढेको बताएकी छन् ।
सगरमाथा, ल्होत्से रहेको क्षेत्रका युवाहरु पर्यटन र आरोहण क्षेत्रमा लागेर धेरै उन्नति प्रगति गरेको भन्दै उनले आफ्नो गाउँका युवाहरुलाई पनि यस क्षेत्रमा लाग्न अभिप्रेरणा मिलोस् भनेर सगरमाथा र ल्होत्से आरोहण गरेको बताएकी छन् ।
प्रतिक्रिया दिनुहोस !
