जोमसोम : हिमाली जिल्ला मुस्ताङमा ६६१ जना बालबालिकालाई आईपीभी खोप लगाइने भएको छ । देश व्यापीरुपमा सञ्चालन भइरहेको आईपीभी खोप अभियान मुस्ताङमा भने जेठ १८ गतेदेखि २६ गतेसम्म सञ्चालन हुने बताइएको छ ।
खोप अभियानअन्तर्गत २०७३ साल वैशाखदेखि २०७५ साल असोजसम्म खोप लगाउन छुटेका र ती समूहका बालबालिकालाई आईपीभी खोप लगाइने बताइएको छ । जसअन्तर्गत मुस्ताङका ५ वटै गाउँपालिकाका गरी ६६१ जना बालबालिकालाई पोलियो भाइरसविरुद्धको आईपीभी खोपबाट लाभान्वित हुनेछन् ।
राष्ट्रिय खोप अभियानअन्तर्गत मनाङ र मुस्ताङमा पोलियो भाइरसविरुद्धको आईपीभी खोप ५ दिन ढिलो गरी सञ्चालन हुने जनाइएको छ । राष्ट्रव्यापी खोप अभियानअन्तर्गत मुस्ताङका ५ वटै स्थानीय तह अन्तर्गत थासाङ गाउँपालिकामा १४७ जना,घरपझोङ गाउँपालिकामा २३९ जना, वारागुङ मुक्तिक्षेत्र गाउँपालिकामा १२६ जना, लोघेकर दामोदरकुण्ड गाउँपालिकामा ५२ जना र लोमान्थाङ गाउँपालिकामा ९७ जना बालबालिकाहरुलाई पोलियो भाइरसविरुद्धको आईपीभी खोप लगाउने कार्ययोजना रहेको स्वास्थ्य कार्यालय मुस्ताङका प्रमुख टिकाराम भण्डारीले जानकारी दिए ।
कार्यालय प्रमुख भण्डारीका अनुसार आईपीभी खोप अभियानका लागि ५ वटै तहका ३० वटा खोप केन्द्रमा ३० जना स्वास्थ्यकर्मी र ६० जना स्वंयसेवक परिचालन गर्ने तयारी गरिएको छ । थासाङमा ८,घरपझोङमा ७ ,वारागुङ मुक्तिक्षेत्रमा ७ ,लोघेकर दामोदरकुण्डमा ५ र लोमान्थाङ गाउँपालिकामा ३ वटा आईपीभी खोप केन्द्र रहने कार्यालय प्रमुख भण्डारीको भनाइ छ ।
लोघेकर दामोदरकुण्डमा जेठ १८,१९ र २० ,लोमान्थाङमा २० र २१,वारागुङ र घरपझोङमा २४ र २५ र अन्तिममा २५ र २६ गते थासाङ गाउँपालिकामा खोप अभियान संञ्चालन हुने स्वास्थ्य प्रमुख भण्डारीले उल्लेख गरे । मुस्ताङमा संञ्चालन हुने आईपीभी खोप अभियानको जानकारी दिने उद्देश्यले बुधबार जोमसोममा जिल्ला खोप समन्वय समिति स्तरीय अभिमुखिकरण तथा पत्रकार अन्तरक्रिया कार्यक्रम गरिएको छ ।
सो अवसरमा स्वास्थ्य कार्यालय मुस्ताङका प्रमुख टिकाराम भण्डारीले खोप अभियानलाई सफल पार्न जनप्रतिनिधि,कर्मचारी,प्रहरी प्रशासन र पत्रकारहरुको महत्वपूर्ण भूमिका रहने उल्लेख गरे । जिल्ला समन्वय समिति प्रमुख माया गुरुङले स्वास्थ्य कार्यालय र स्वास्थ्यसंग सम्वन्धि निकायहरूले कोभिड माहामारीका बेला पनि निकै ठूलो काम गरेको बताइन् । उनले पोलियोविरुद्धको खोप अभियायनमा उल्लेखित उमेर समूहका बालबालिकालाई पहुँचमा जोड्न सम्वद्ध निकायले सहयोग गर्नुपर्ने जनाइन् ।
एमाले मुस्ताङका सचिव तिलक विकले रोग प्रतिरोधात्मक क्षमता बढाउन खोप अभियान निकै समय सान्दर्भिक भएको बताए । नेपालमा सन् २०१० मा पोलियो विरुद्ध हुने रोग उन्मुलन भएको कार्यक्रममा बताइएको छ । विश्वमै यो रोगको जोखिम कायमै रहेकाले नेपालमा पनि पोलियो भाईरसविरुद्धको खोपलाई प्राथमिकतामा राखिएको हो ।
कार्यक्रममा स्वास्थ्य कार्यालय प्रमुख भण्डारीले पोलियो भाइरसविरुद्ध हुने आईपीभी खोप लगाउनुको उद्देश्य बारेमा प्रस्तुतिकरण गरेका थिए ।
प्रतिक्रिया दिनुहोस !
