तुइनबाट मोटरसाइकल तार्न १ हजार रुपैयाँ र मानिस आउजाउ गर्न दुई सय रुपैयाँ तुइन मालिकलाई बुझाउनुपर्छ ।
हुम्ला : पूर्वप्रधानमन्त्री केपी शर्मा ओली २०७२ सालमा प्रधानमन्त्री बन्नासाथ दुई वर्षभित्र तुइन विस्थापन गरिसक्ने घोषणा गरेका थिए । जहाँजहाँ तुइन छन्, ती ठाउँमा झोलुंगे पुलमार्फत तुइन विस्थापन गर्न उनले पहल सुरु गरे ।
घोषणा गरेको ९ वर्ष बितिसक्दा पनि हुम्लाका जनप्रतिनिधिदेखि स्थानीयवासी जोखिम मोलेर गाउँपालिका केन्द्रसम्म तुइनबाटै आउजाउ गर्न बाध्य छन् । हुम्लाको सर्केगार्ड गाउँपालिकाका उपाध्यक्ष चन्द्रसिंह कार्की गाउँबाट पालिका केन्द्र तुइन चढेरै आउजाउ गर्न बाध्य छन् । उनीसँगै वडा नम्बर २ का वडाध्यक्ष सिद्ध कार्की पनि पालिकामा काम विशेषले जानुपरेमा तुइनकै भर पर्ने गरेका छन् ।
उपाध्यक्ष र वडाध्यक्ष मात्रै होइन, रिप गाउँका ३१९ घरधुरीका स्थानीयबासी तुइनबाटै कर्णाली नदी आउजाउ गर्न बाध्य रहेका सर्केगाड गाउँपालिका २ रिप गाउँकी सुरी फडेराको गुनासो छ । ‘कर्णाली नदीमा झोलुंगे पुल नहुँदा तुइनबाट आउजाउदेखि सामान तार्ने गरेका छौं’, फडेराले बताइन् ।
‘नदीभन्दा पारी सडक छ । गाउँपालिका आउजाउ गर्न र गाडी चढ्न पारी जानुपर्छ’, फडेराको दुखेसो छ । झोलुंगे पुल नहुँदा तुइनबाट तार्ने समयमा घर निर्माणका लागि खरिद गरेर ल्याएको ६ बन्डल जस्तापाता नदीमा खसेर बगाएको सर्केगाड गाउँपालिका २ की गीता कार्कीले बताइन् । कर्णाली नदीमा झोलुंगे पुल नहुँदा गाउँपालिका केन्द्र आउजाउ गर्न निकै समस्या भएको उनले दुखेसो पोखिन् ।
पुल निर्माण नहुँदा रिप गाउँका मात्र नभई सर्केगाड गाउँपालिका २ उनापानीका ३६५ घरधुरीका स्थानीयले सास्ती खेप्दै आएका छन् । यसैगरी चंखेली गाउँपालिका केन्द्रमा पर्ने लोती कर्णालीमा पुल नहुँदा चंखेलीवासी तुइनबाट आउजाउ गर्न बाध्य छन् ।
मुगु र हुम्ला जिल्ला जोड्ने लिंक रोड निर्माण गरे पनि कर्णाली नदीमा पुल निर्माण ढिलाइ भएको छ । बेलायतको अन्तर्राष्ट्रिय विकास नियोग डीएफआईडीले मुगु र हुम्ला जोड्ने ६५ किलोमिटर लिंक रोड निर्माण गरेको वर्षांै दिन बितिसक्दासमेत बेलिब्रिज पुल निर्माण कार्यमा ढिलाइ हुँदा तुइनबाट मोटरसाइकल तारेर स्थानीय आउजाउ गर्न बाध्य देखिएका छन् ।
तुइनबाट मोटरसाइकल तारेबापत तुइनको मालिकले १ हजार लिने गरेको चंखेली गाउँपालिका १ का वडाध्यक्ष गोबिन्द बोहराले जानकारी दिए । ‘पालिका केन्द्र आउजाउ गर्न मोटरसाइकल छ । तर, पुल नहुँदा नदीभन्दा पारी छोडेर आउजाउ गर्न बाध्य छौं’, वडाध्यक्ष बोहराले भने । मोटरसाइकल तार्न १ हजार रुपैयाँ र मानिस आउजाउ गर्न दुई सय रुपैयाँ तुइन मालिकलाई बुझाउनुपर्ने उनको भनाइ छ ।
ग्रामीण पहुँच कार्यक्रमअन्तर्गत डीएफआईडीले मुगु हुम्ला जोड्ने लिंक रोड निर्माण गरे पनि हालसम्म कर्णाली नदीमा पुल निर्माण नहुँदा स्थानीय तुइनबाट आवतजावत गर्न बाध्य छन् । सवारीसाधन वारपार गर्नसमेत कठिनाइ भएको बोहराको भनाइ छ ।
हुम्लाको खापुनार्थ गाउँपालिका १ को लाली बगरमा कर्णाली करिडोरको सडक निर्माणका क्रममा झोलुंगे पुल भत्किएपछि खापुनाथ गाउँपालिका २ थाली गाउँका स्थानीयबासी पनि तुइनकै भर पर्दै आएका छन् । नदीभन्दा पारी सडक भएपछि सदरमुकाम सिमकोट गाडी चढेर जान कर्णाली नदीको तुइनकै भर पर्न उनीहरू बाध्य छन् ।
प्रतिक्रिया दिनुहोस !
