सुदूरपश्चिममा गठबन्धन सरकार : भागबण्डा मिलाउन तीनवटा मन्त्रालय फुटाइँदै

धनगढी : सुदूरपश्चिममा गठबन्धनभित्र भागबण्डा मिलाउन  मन्त्रालय फुटाउने तयारी भएको छ । नेकपा एमाले र माओवादी केन्द्रलाई तीन/तीन वटा मन्त्रालय दिनका लागि मन्त्रालय फुटाउन लागिएका हुन् । सुदुरपश्चिममा अहिले मुख्यमन्त्री तथा मन्त्रीपरिषदको कार्यालयसहित ७ वटा मन्त्रालय छन् । 

तीनवटा फुटाएर १० मन्त्रालय बनाउने तयारी भएको हो । संविधानमा पनि कूल प्रदेश सभा सदस्यको २० प्रतिशतसम्म मन्त्रालय बनाउन पाउने प्रावधान छ । सुदूरपश्चिममा ५३ प्रदेश सभा सिट छ । 

नेकपा एमाले (११), माओवादी (सभामुखसहित) (११),नागरिक उन्मक्तिको रञ्जिता पक्षका २ जना र स्वतन्त्र सांसदको समर्थनमा नेकपा एकीकृत समाजवादी (४) का नेता दीर्घ बहादुर सोडारी बैशाखको ६ गते मुख्यमन्त्री भएका हुन् ।

मुख्यमन्त्री भएको झण्डै २ महिनापछि हुन लागेको सरकार विस्तारमा एमाले र माओवादीले तीन/तीन मन्त्रालय मागेपछि सोडारीले मन्त्रालय विभाजन गर्न लागेका हुन । ‘उन्मुक्तिका २ जना प्रदेश सभा सदस्य नै मन्त्री भए, एमाले र माओवादीका ११/११ प्रदेश सभा सदस्य छन,उनीहरूले तीन/तीन मन्त्रालय मागेपछि मुख्यमन्त्रीसँग मन्त्रालय विभाजनको विकल्प छैन,' एकजना समाजवादीका नेताले भने ।

मन्त्रालय विभाजनका लागि नेकपा एमाले र माओवादी पनि तयार छन् । तर, स्वतन्त्र सांसद डाक्टर ताराप्रसाद जोशीले भने मन्त्रालय विभाजनले जनतामा नराम्रो सन्देश जाने बताए । ‘एउटा मन्त्रालय विभाजन गरे त हो तर तीन/तीन मन्त्रालय फुटाएर भागबण्डा मिलाउनु राम्रो होइन,'उनले भने, ‘यसले जनतामा नराम्रो सन्देश जान्छ ।’ 

उनले मन्त्रालय फुटाएमा आफू मन्त्री नहुने बताए ।  मन्त्रालय फुटाउने कुरामा नाउपाबाट भौतक पूर्वाधार मन्त्री बनेका कैलाश चौधरी पनि तयार छैनन् । उनले पार्टी अध्यक्ष रञ्जीता चौधरी र मुख्यमन्त्री सोडारीलाई मन्त्रालय विभाजन नगर्न आग्रह गरेको बताए । 

मुख्यमन्त्री सोडारीले भौतिक पूर्वाधार विकास मन्त्रालय, सामाजिक विकास मन्त्रालय र उद्योग पर्यटन बन तथा वातावरण मन्त्रालय विभाजन गर्ने तयारी गरेका छन् । ‘मन्त्रालयहरू विभाजन गरेर १० मन्त्रालय बनाइन्छ, अनि त्यसपछि भागबण्डा मिलाएर शपथ हुने तयारी भएको छ,'मुख्यमन्त्री तथा मन्त्रिपरिषद कार्यालय स्रोतले भन्यो ।