स्याङ्जा : पूर्व शिक्षामन्त्री एवं नेपाली कांग्रेसका केन्द्रीय सदस्य गोपालमान श्रेष्ठले शिक्षा नीति संशोधन गरेर स्नातक तहलाई ३ वर्षे बनाउनुपर्ने बताएका छन्। चार वर्षे स्नातक तह पाठ्यक्रमका कारण विद्यार्थी विदेश पलायन मध्ये एउटा कारण भएको उनले बताए।
स्याङ्जा सदरमुकाम पुतलीबजार नगरपालिका-१ स्थित त्रिभुवन आदर्श बहुमुखी क्याम्पमा बिहीबार आयोजित कार्यक्रमलाई सम्बोधन गर्दै शिक्षा, मानविकी तथा सामाजिक विज्ञान विषयमा स्नातक तह ४ वर्षे बनाइँदा विद्यार्थीले लामो समयको बोझ ठान्दै अध्ययनका बहानामा विदेश पलायनको बाटो रोजेको उनको भनाइ छ।
पूर्व शिक्षामन्त्री समेत रहेका श्रेष्ठले भने, ‘प्लस टु सकेको एक विद्यार्थीलाई ४ वर्षे स्नातकको नतिजा आउँदा ६ वर्ष लाग्छ, त्यसपछि पनि जागिरको ग्यारेन्टी हुँदैन। चार वर्ष अध्ययनमा बिताउनु भनेको अत्यन्तै लामो र खर्चिलो भएकाले भर्ना पछि पनि पढाई छाड्ने क्रम बढ्दो छ।’
‘२०४७ ताका प्रवीणता तह २, स्नातक २ र स्नातकोत्तर २ वर्षका हुन्थे। सक्षम र जेहनदार विद्यार्थीले समयमै आफ्ना पढाइ सकेर रोजगारमा जोडिन्थे। तर, अहिले पढाइ पनि लामो बन्दै गएकाले विद्यार्थीमा बोझ थपिएको छ। अबको शिक्षा व्यावहारिक एवं दक्ष जनशक्ति उत्पादन गर्ने खालको हुनुपर्छ’, उनले भने।
प्राविधिक तथा सीपमूलक शिक्षा दिई यहाँका विद्यार्थी स्वदेशमै अडिने वातावरण बनाउन समेत क्याम्पस परिवारलाई सुझाव दिए।
प्रतिक्रिया दिनुहोस !
