विराटनगर : विराटनगरमा अविरल वर्षासँगै चट्याङ पर्ने क्रममा बिजुली चम्किदा ढलेका वृद्धको मृत्यु भएको छ । विराटनगर महानगरपालिका–१७ मटेरुवाका ७० वर्षीय हबी बुल्ला मियाँको शुक्रबार बिहान मृत्यु भएको प्रहरीले जनाएको छ ।
प्रहरीका अनुसार मस्जिदबाट नमाज पढेर फर्कदै गरेका मियाँ बिजुली चम्किदा बेहोस भएर बिहान ६ बजेतिर ढलेका थिए । आफन्तले उपचारका लागि विराटनगरको नोबेल शिक्षण अस्पताल पुर्याउनसाथ उनलाई चिकित्सकले मृत घोषित गरेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।
उनका अनुसार शवलाई पोस्टमार्टमका लागि कोशी अस्पतालमा लगिएको छ । घटनाका सम्बन्धमा अनुसन्धान सुरु गरिएको जानकारी बस्नेतले दिए । त्यस्तै, मोरङको सुन्दरहरैँचा नगरपालिका–१० सयपत्री टोलमा बिहान ४ :३० बजेतिर परेको चट्याङले क्षति पुर्याएको छ ।
चट्याङ परेर आगलागी हुँदा स्थानीय यमनाथ बरालको परालको कुन्यू जलेर ध्वस्त भएको छ । १ बिघा जमिनको परालको कुन्यू जल्दा २० हजार बराबरको क्षति भएको प्रहरीले जनाएको छ । नेपाल प्रहरी, स्थानीय र दमकलको सहयोगमा ५ बजेतिर आगो नियन्त्रणमा लिइएको थियो ।
चट्याङले सुन्दरहरैँचा–१० कै हिक्मत राउतको घरमा रहेको एउटा टिभी र वाइरिङ गरेको तारको बोर्डमा क्षति पुर्याएको प्रहरीले जनाएको छ । घटनामा २० हजार बराबरको क्षति भएको अनुमान छ । यसैबीच,चट्याङले धनपालथान गाउँपालिका–३ बेतौनाका मानबहादुर राजवंशीको गाई र बाच्छी मारेको छ ।
मसलाको रुखमा बाँधिएका गाई र बाच्छीलाई बिहान ७ बजेतिर परेको चट्याङले मारेको इलाका प्रहरी कार्यालय रंगेलीले जनाएको छ ।
प्रतिक्रिया दिनुहोस !
