ऊर्जामन्त्रीलाई लिङ्देनको सुझाव : बुढीगण्डकीको पानी  चितवन, बारा, पर्सा र रौतहटमा वितरण गर्ने व्यवस्था गर्नुहोस्

काठमाडौं : राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले बुढीगण्डकी आयोजनालाई बहुउद्देश्यीय आयोजना बनाउनुपर्ने प्रस्ताव अघि सारेका छन्। आइतबार प्रतिनिधिसभा बैठकमा बोल्दै अध्यक्ष लिङदेनले बुढीगण्डकीलाई बहुउद्देश्यीय आयोजना बनाएर त्यहाँको पानी चितवन,बारा,पर्सा र रौतहटमा वितरण गर्न उर्जामन्त्री शक्तिबहादुर बस्नेतलाई सुझाव दिएका हुन्।

'चितवन, बारा, पर्सा, रौतहट सुख्खाग्रस्त छ। यहाँ स्थानीय खानेपानीको समस्याबाट काकाकुल छन्। हामीले बुढीगण्डकीलाई बहुउद्देश्यीय आयोजना बनाएर यहाँको पानी चितवन, बारा, पर्सा, रौतहटमा लगियो भने हाम्रो पानी भारतले प्रयोग गर्ने कि नगर्ने अथवा उसले हामीलाई सहयोग गर्ने कि नगर्ने भन्ने विषयमा छलफल आवश्यक छैन। हामीले हाम्रो पानी आफै प्रयोग गर्छौं।'

लिङ्देनले  देवघाटदेखि गोरखाको उत्तरी भेगसम्म जलमार्ग बनाउन सकिने सु्झाए। उनले व्यापक ढंगले छलफल गरेर अगाडि बढेमा एउटै आयोजनाले त्यस क्षेत्रको कायलपटल गर्न सकिने बताए। उनले तमोर जलाशययुक्त आयोजनालाई बजेटमा नसमेटिएको भन्दै आपत्ती जनाए।

नेता लिङ्देनले नेपाली लगानीलाई प्रोत्साह गर्नुपर्नेमा जोड दिए। उनले उर्जाको क्षेत्रमा लगानीका लागि विदेशीहरूलाई आमन्त्रण गर्न समेत आग्रह गरे। ऊर्जा उत्पादन र खपतका लागि विशेष प्रकारको नीति ल्याउनुपर्नेमा सरकारले त्यसतर्फ ध्यान दिन नसकेको टिप्पणी गरे।