गुल्मी : गुल्मीमा छल्दी खोलाले बगाउँदा एक पुरुषको मृत्यु भएको छ । जिल्लाको रेसुङ्गा नगरपालिका-१४ पराल्मीका ६८ वर्षीय खुमबहादुर सामतको मृत्यु भएको जिल्ला प्रहरी कार्यालय गुल्मीले जनाएको छ।
मृतक सामत शुक्रबार भेटघाटको लागि मुसिकोट नगरपालिका १ अरेवा ससुराली गएका थिए । त्यसदिन राती जिल्लाका विभिन्न भागमा पानी गरेको थियो । पानीले खोला बढेका मात्रै थिएनन् कतिपय ठाँउमा पहिरो खसेर सडक अवरुद्धसमेत पारेको थियो ।
शनिबार दिउँसो करिब २:३० बजेको समयमा घर फर्कने बेला छल्दी खोला तर्ने क्रममा समातको खोलाले बगाएर ज्यान गएको जिल्ला प्रहरी कार्यालय गुल्मीका सूचना अधिकारी प्रहरी नायव उपरीक्षक शंकर पोखरेलले जानकारी दिए ।
खोलामा शव देखेपछि माछा मार्न पुगेका स्थानीयले प्रहरीलाई खबर गरेका थिए । सामतलाई खोलाले बगाएर करिब ५०० मिटर तल पुर्याएको थियो । प्रहरी खबर पाएलगत्तै घटनास्थलमा पुगेर मुचुल्का गरी मृतकको शव पोस्टमर्टमका लागि गुल्मी अस्पतालमा ल्याइएको प्रहरीले जनाएको छ । घटना बारे प्रहरीले थप अनुसन्धान गरिरहेको छ ।
प्रतिक्रिया दिनुहोस !
