लमजुङको बगुम पहिरोमा बेपत्ता चारैजनाको शव भेटियो, दोर्दीमा एकको मृत्यु

बेसीसहर : लमजुङको क्व्होलासोथार गाउँपालिका- ३, बगुममा मंगलबार राति पहिरोले घर बगाउँदा बेपत्ता भएका ४ जनाको शव भेटिएको छ । गएराति १ बजेतिर पहिरोले ३ वटा घर बगाउँदा २ घरका ४ जना बेपत्ता भएका थिए । स्थानीय, प्रहरी र जनप्रतिनिधि मिलेर खोजतलास गर्दा चारैजनाको शव फेला परेको हो । 

जिल्ला प्रहरी कार्यालय प्रमुख डीएसपी मिनबहादुर घलेका अनुसार पहिरोमा परेर ७० वर्षीय रुद्रमान गुरुङ,अर्को घरमा बस्ने रुद्रमानका बुहारी ३७ वर्षीया पञ्चकुमारी गुरुङ, पञ्चकुमारीका २ छोरीहरू अन्दाजी ९ वर्षीया इच्छा र अन्दाजी ५ वर्षीया नम्रता गुरुङको शव फेला परेको छ ।  ३६ वर्षीय भीमबहादुर घले घाइते रहेको र उपचारका लागि सदरमुकाम बेंसीसहर पठाइएको उनले बताए ।

क्व्होलासोथार गाउँपालिका अध्यक्ष सूर्यप्रसाद गुरुङका अनुसार आमा र २ छोरीको शव घरबाट करिब १५–२० मिटर तल र  हुमदेवी गुरुङको धन्सारको आडमा एकैठाउँमा फेला परेको थियो । रुद्रमानको शव भने आफ्नै आँगनको तल्लो कुनामा भेटिएको क्व्होलासोथार गाउँपालिका-३ का वडाअध्यक्ष आसविर गुरुङले जानकारी दिए ।

योसँगै लमजुङमा पहिरोबाट मर्नेको संख्या ५ पुगेको छ । दोर्दी गाउँपालिका ९, धैरेनी सुनारगाउँमा मंगलबार राति पहिरोले घर पुरिँदा १६ वर्षीय विकल सुनारको मृत्यु भएको छ । उनका दाइ १८ वर्षीय मिलन सुनार घाइते भएका छन् । २ दाजुभाइ सुतिरहेको अवस्थामा माथिबाट पहिरो घरमा खसेपछि दुवैजना घाइते भएका थिए । 

घाइते दुवैजनालाई उपचारका लागि बेंसीसहरस्थित लमजुङ अस्पताल ल्याइकोमा अस्पताल ल्याइएकोमा विकललाई चिकित्सकले मृत घोषणा गरेका थिए । घाइते मिलनको उपचार भइरहेको प्रहरीले जनाएको छ ।

यस्तै मर्स्याङ्दी गाउँपालिका वडा नं. ९ लामागाउँमा बलबहादुर गुरूङ र युद्वजंग गुरूङको घर पहिरोले पुरेको छ । मानवीय क्षति नभएपनि अन्य उद्दारकार्य भइरहेको खुदी प्रहरी चौकीका प्रमुख प्रेमप्रसाद शर्माले जानकारी दिए ।