परासी : जनप्रतिनिधिहरूबीच किचलोले नवलपरासीको पाल्हीनन्दन गाउँपालिकाले आगामी वर्षको बजेट समयमा ल्याउन सकेन । जिल्लामा ३ नगरपालिका र ४ गाउँपालिका छन् । आर्थिक वर्षको असार १० गतेभित्र बजेट ल्याउनुपर्ने कानुनी प्रावधान छन् ।
जिल्लाका अन्य सबै स्थानीय तहले समयमा बजेट ल्याए पनि पाल्हीनन्दनले भने ल्याउन नसकेको हो । योजना र कार्यक्रम छनौटका विषयमा जनप्रतिनिधिबीच कुरा नमिल्दा बजेट आउन नसकेको बताइएको छ ।
स्थानीय सरकार सञ्चालन ऐन, २०७४ र अन्तर सरकारी वित्त व्यवस्थापन ऐनअनुसार समयमा बजेट नल्याउने स्थानीय तहको वार्षिकरुपमा संघ सरकारबाट पाउने समानीकरण अनुदान घट्न जान्छ ।
समयमा बजेट ल्याउ नसक्नुलाई पाल्हीनन्दन गाउँपालिका अध्यक्ष बैजु प्रसाद गुप्ताले वडा अध्यक्षहरूलाई दोष दिएका छन् । ‘वडा अध्यक्षहरूलाई योजना छनौट गरेर पठाउन पटक पटक भने पनि नल्याएका कारण समयमा बजेट ल्याउन सकिएन,'अध्यक्ष गुप्ताले भने ।
केही दिनमा छलफल गरेर बजेट प्रस्तुत गर्ने मिति तय गरिने अध्यक्ष गुप्ताको भनाइ छ । समयमा योजना छनौट गर्न नसकेको अध्यक्ष आरोपबारे वडा नं. ६ का अध्यक्ष कृष्णलाल यादवले गाउँपालिकाले ढिलो गरी बजेट सिलिङ पठाएकाले योजना छनौटमा समस्या भएको बताउँछन् ।
राजश्व परामर्श समितिको बैठकमा समेत पूर्णरुपमा छलफल हुन नसकेको उनको भनाइ छ । प्रमुख प्रशासकीय अधिकृत प्रेमबहादुर रोकाहाले जनप्रतिनिधिहरूको आपसी असन्तुष्टिका कारण बजेट समयमा आउन नसकेको बताए । ‘प्रशासनिक काम सबै पूरा भएको छ,जनप्रतिनिधिहरुको असन्तुष्टिले बजेट आउन नसकेको हो । उहाँहरूले चाहे एक/दुई दिनमा बजेट ल्याउन सकिन्छ,'रोकाहाले भने ।
कस्तो असन्तुष्टि भन्नेबारे उनले केही खुलाएनन् । यसैबीच जिल्लाका ६ स्थानीय तहको कूल बजेट ५ अर्ब ५१ करोड ८३ लाख रहेको छ । सबैभन्दा बढी रामग्राम नगरपालिकाको १ अर्ब ४२ करोड ४० लाख रहेको छ । सबैभन्दा कम बजेट सरावल गाउँपालिकाको ५३ करोड ४८ लाख रहेको छ ।
त्यसैगरी सुनवल नगरपालिकाको १ अर्ब १८ करोड ९२ लाख, बर्दघाट नगरपालिकाको ९१ करोड ७८ लाख रहेको छ । त्यस्तै प्रतापपुर गाउँपालिकाको ७१ करोड ७९ लाख, सुस्ता गाउँपालिको ६५ करोड रहेको छ । बजेट ल्याएका सबैजसो स्थानीय तहहले कृषि, स्वास्थ्य, सिँचाई,पूर्वाधारलगायतमा बढी रकम विनियोजन गरेका छन् ।
विनियोजन गरिएको बजेटमा अधिकांश स्थानीय तहहले पुरानै योजना र कार्यक्रमलाई दोहर्याएका छन्।
प्रतिक्रिया दिनुहोस !
