बेनी : म्याग्दीको मालिका गाउँपालिका-५ पन्थोकमा वडा कार्यालय भवन निर्माण भएको छ। मालिका गाउँपालिकाले ७६ लाख रुपैयाँको लागतमा ७ कोठे एक तले भवन निर्माण गरेको हो।
अपांगमैत्री, भूकम्प प्रतिरोधी क्षमता भएको भवन निर्माणका लागि गत मंसिर १८ गते भगवती मालिका कन्स्ट्रक्सनसँग ७६ लाख ७ लाख ५८८ रुपैयाँमा ठेक्का सम्झौता भएको थियो।
निर्माण कम्पनीका प्रतिनिधि विजय भट्टचनले असार मसान्त सम्म म्याद भएपनि लक्ष्य अघि नै भवन निर्माण सकिएको जानकारी दिए। १ वटा सभा हल, वडाध्यक्ष, सचिव, वडा सदस्य, प्राविधिक, सहयोगी र भण्डारण कक्ष भएको भवनमा ४ वटा शौचालय र शयनकक्ष छन्।
वडाध्यक्ष मिम पुनले हस्तान्तरण भएपछि नयाँ भवनबाट सेवा सुरु गर्ने बताए। यसअघि भीम मावि परिसरमा रहेको साविक देविस्थान गाविसको पुरानो र जीर्ण भवनबाट वडा कार्यालय सञ्चालन हुँदै आएको थियो।
७ वटा वडा रहेको मालिका गाउँपालिकाको यसअघि वडा नं. ३ को किटिनिमा भवन निर्माण भएको थियो। वडा नं. ६ को कार्यालय तत्कालीन दरवाङ गाविसको भवनबाट सञ्चालन हुने गरेको छ।
आगामी आर्थिक वर्षका लागि गाउँपालिकाको प्रशासकीय, वडा नं. १ र ७ को भवन बनाउन २ करोड रुपैयाँ बजेट विनियोजन भएको अध्यक्ष बेगप्रसाद गर्बुजाले बताए। वडा नं. २ रुम र वडा नं. ४ ओखरबोटको कार्यालय पनि पुरानो भवनबाट सञ्चालन हुँदै आएको छ।
प्रतिक्रिया दिनुहोस !
