गुलरिया : तीन दिनदेखि परेको अविरल वर्षाका कारण बबई नदीमा पानीको बहाव बढेको छ । बहाव घटबढ भइरहेपछि तटीय क्षेत्रका स्थानीयलाई सर्तकता अपनाउन अनुरोध गरिएको छ । शनिबार राति चेपाङ वेसिनमा सर्तकता तह पार गरेको बबई नदीले आइतबार बिहान केही घण्टा सामान्य अवस्थापछि पुनः सर्तकता तह पार गर्यो ।
यतिखेर चेपाङमा बबई नदीको सतह ५.६५ मिटर छ । चेपाङमा ५.५० मिटर चेतावनी तह र ६.८० मीटरलाई खतराको तह मानिन्छ । त्यस्तै बर्दियाको गुलरिया स्थित बबई (भादा) नदीमा नदीको चेतावनी तह ७ मिटर छ । त्यहाँ ८ मिटर पानीको सतहलाई खतरा मानिन्छ ।
बबई नदी घटबढ भइरहेकोले तटीय क्षेत्रका स्थानीयहरूले सजगता अपनाउनु पर्ने प्रमुख जिल्ला अधिकारी एवम् विपद व्यवस्थापन समिति बर्दियाकी अध्यक्ष रुद्रादेवी शर्माले बताइन् । वर्षाको समय छ । नदी जुनसुकै बेला बढ्न सक्ने भएकाले सतर्क रहन समितिले सूचना जारी गरेको हो ।
उनले भनिन्,' विपद् व्यवस्थापनको सबै तयारी गरेका छौं । जोखिम न्युनिकरण गर्न तिनै तहका सुरक्षा निकाय,स्थानीय तहलगायत सरोकारवालाहरूसँग समन्वय भइरहेको छ।'
प्रतिक्रिया दिनुहोस !
