हेटौंडा : बागमती प्रदेशको १३ जिल्लामा कुल १ लाख १४ हजार ५ सय ६१ हेक्टर जमिनमा धानखेती हुने गरेकोमा हालसम्म ४०.१९ प्रतिशत मात्रै रोपाइँ भएको छ । यस वर्ष मनसुन ढिला सुरु भएकाले रोपाइँ ढिला भएको हो ।
बागमतीमा बिहीबारबाट मात्रै मनसुन सुरु भएकाले एकातिर बाढी पहिरोको त्रास र अर्कोतिर रोपाइँको चटारो छ । हालसम्म ४६ हजार ४५ हेक्टर जमिनमा रोपाइँ सम्पन्न भएको कृषि तथा पशुपन्छी विकास मन्त्रालय बागमती प्रदेशका सूचना अधिकारी अनुप अधिकारीले जानकारी दिए ।
उनका अनुसार प्रदेशका १३ जिल्लामध्ये दोलखामा सबैभन्दा बढी रोपाइँ भएको छ । दोलखामा २ हजार ८ सय १४ हेक्टर जमिनमा धान रोपाइँ हुँदै आएकोमा यस वर्ष १ हजार ७ सय १७ हेक्टरमा रोपाइँ भएको छ ।
त्यस्तै, काठमाडौंमा ५ हजार ९ सय २६ हेक्टरमध्ये १ हजार ४ सय २२ हेक्टर क्षेत्रफल अर्थात् २४ प्रतिशत क्षेत्रफलमा रोपाइँ भएको हो । प्रदेशको भक्तपुरमा ३ हजार ७ सय १९ हेक्टरमा अर्थात् ८ सय ९३ हेक्टर अर्थात् २४ प्रतिशत र २४ हजार २ सय ४७ हेक्टर क्षेत्रफलमा रोपाइँ हुने गरेको चितवनमा ११ हजार ९ सय ४८ हेक्टरमा अर्थात् ४९.२८ प्रतिशत रोपाइँ सकिएको हो ।
- मनसुन सुरु भएकाले एकातिर बाढी पहिरोको त्रास र अर्कोतिर रोपाइँको चटारो छ । हालसम्म ४६ हजार ४५ हेक्टर जमिनमा मात्रै रोपाइँ भएको छ ।
- बागमती प्रदेशका १३ जिल्लामध्ये दोलखामा सबैभन्दा बढी रोपाइँ भएको छ । दोलखामा यस वर्ष १ हजार ७ सय १७ हेक्टरमा रोपाइँ भएको छ ।
मकवानपुरमा भने धान रोपाइँका लागि उपयुक्त ९ हजार ४ सय ५० हेक्टर जमिनमध्ये ३ हजार ५ सय १५.४ हेक्टर अर्थात् ३७.२ प्रतिशत क्षेत्रफलमा र नुवाकोटमा ११ हजार ६ सय १२ हेक्टर जमिनमध्ये ४ हजार ६४.२ हेक्टर अर्थात् ३५ प्रतिशत जमिनमा धान रोपाइँ सकिएको हो ।
सबैभन्दा कम रोपाइँ ललितपुरमा भएको छ । जहाँ ४ हजार १ सय ६३ हेक्टर क्षेत्रफलमध्ये ८ सय ३३ हेक्टर अर्थात् २० प्रतिशत क्षेत्रफलमा मात्रै रोपाइँ भएको छ । त्यस्तै, रसुवामा १ हजार ९३ हेक्टर क्षेत्रफलमा धान रोपाइँ हुने गरेकोमा यस वर्ष ४ सय १५ हेक्टर अर्थात् ३८ प्रतिशत, धादिङमा १३ हजार ६ सय हेक्टर जमिनमध्ये ४ हजार ५ सय ५ हेक्टर अर्थात् ३९.८२ प्रतिशतमा रोपाइँ भएको कृषि तथा पशुपन्छी विकास मन्त्रालय बागमती प्रदेशको तथ्यांकमा उल्लेख छ ।
सिन्धुलीमा ११ हजार १ सय ८८ हेक्टर जमिनमध्ये ४९ प्रतिशत, रामेछापमा ७ हजार ८ सय ५९ हेक्टर जमिनमध्ये २२ प्रतिशत, काभ्रेपलाञ्चोकमा १० हजार १ सय ८ हेक्टर जमिनमध्ये ५३.८४ प्रतिशत र सिन्धुपाल्चोकमा ८ हजार ७ सय ८२ हेक्टर जमिनमध्ये ४६.४ प्रतिशतमा धान रोपाइँ सकिएको मन्त्रालयले जनाएको छ ।
प्रतिक्रिया दिनुहोस !
