अमेरिकी पूर्व राष्ट्रपति डोनाल्ड ट्रम्पमाथि स्टेजमा बोल्दै गर्दा गोली प्रहार
असार ३०, २०८१ आइतबार ७:२१:५६
वासिङटन डिसी : अमेरिकी पूर्व राष्ट्रपति डोनाल्ड ट्रम्पमाथि गोली प्रहार भएको छ। पेन्सिलभेनियाको बटलरमा एक र्यालीका क्रममा ट्रम्पमाथि गोली प्रहार भएको हो। ट्रम्प बटलरमा मञ्चमा बोल्दै गर्दा गोली चलेको थियो। ट्रम्पले दाहिने कानको माथिल्लो भागमा गोली लागेको हो।
एजेन्टहरूले ट्रम्पलाई उभिन मद्दत गर्दा ट्रम्पको अनुहार र कानमा रगत देखिएको थियो।
दुर्घटनाका सम्बन्धमा ट्रम्पले आफूलाई दाहिने कानको माथिल्लो भागमा गोली लागेको बताए। उनले सामाजिक सञ्जालमा पोस्ट गर्दै भनेका छन् , 'मैले कान नजिकै असजिलो महसुस गरें, जसले मलाई तुरुन्तै केही गलत भएको महसुस गरायो। धेरै रगत बगेको थियो।'
ट्रम्पले युनाइटेड स्टेट्स सेक्रेट सर्भिस र सबै कानून प्रवर्तन अधिकारीहरूलाई धन्यवाद दिएका छन्। 'र्यालीमा ज्यान गुमाएका व्यक्तिका परिवार र गम्भीर घाइते भएका अर्का व्यक्तिका परिवारजनमा समवेदना प्रकट गर्न चाहन्छु। हाम्रो देशमा यस्तो घटना हुनु दुर्भाग्यपूर्ण हो। गोली प्रहार गर्नेको हत्या भइसकेको भए पनि हालसम्म केही थाहा हुन सकेको छैन।' ट्रम्पले भनेका छन्।
यस घटनाबारे अमेरिकी राष्ट्रपति जो बाइडेनले प्रेस ब्रिफिङ गरेका छन्। उनले अमेरिकामा यस्तो हिंसाको कुनै ठाउँ नभएको बताए। बाइडेनले ट्रम्पलाई सम्पर्क गर्ने प्रयास गरे पनि ट्रम्प अहिले डाक्टरहरूसँग रहेको भन्दै कुराकानी हुन नसकेको बताए।
सामाजिक सञ्जाल पोस्टमा उनले भनेका छन्, ‘मैले डोनाल्ड ट्रम्पको र्यालीमा गोली चलेको थाहा पाएको छु। ट्रम्प सुरक्षित छन् र उनको अवस्था ठीक छ भन्ने थाहा पाउँदा म आभारी छु। हामी यस घटनाको बारेमा थप जानकारीको लागि पर्खिरहेका छौं। म ट्रम्प र उनको परिवारका साथै र्यालीमा सबैको लागि प्रार्थना गर्दैछु। जिल र म ट्रम्पलाई सुरक्षामा पुर्याएकोमा गोप्य सेवाप्रति आभारी छौं।'
उपराष्ट्रपति कमला ह्यारिसले पेन्सिलभेनियामा पूर्व राष्ट्रपति ट्रम्पको कार्यक्रममा गोली हानाहान भएको जानकारी पाएको बताइन्। 'हामी उनको परिवार र गोलीबारीमा घाइते भएका सबैको लागि प्रार्थना गर्दछौं। हामी यूएस गोप्य सेवा, पहिलो प्रतिक्रियाकर्ताहरू र स्थानीय अधिकारीहरूले तुरुन्तै कदम चालेकोमा आभारी छौं। हाम्रो देशमा यस्तो हिंसाको कुनै ठाउँ छैन। हामी सबैले यस घृणित कार्यको निन्दा गर्नुपर्छ र यसले थप हिंसा नहोस् भनेर सुनिश्चित गर्नुपर्छ', उनले भनिन्।
प्रतिक्रिया दिनुहोस !
