त्रिशुलीमा बस दुर्घटना : फेला नपरेपछि कुशको शव बनाएर सृष्टि यादवको गरियो दाहसंस्कार
साउन ४, २०८१ शुक्रबार १४:३२:७
सिमरा : त्रिशूली नदीमा बेपत्ता भएको एन्जल बसकी यात्रु सृष्टि यादवको शव नभेटिएपछि परिवारले कुशको शव बनाएर दाहसंस्कार गरेका छन् । घटनाको छैठौं दिनसम्म स्थिति अज्ञात बनेपछि कलैया उपमहानगरपालिका- १४ की सृष्टिका अभिभावकले कुशको शव बनाएर दाहसंस्कार गरेका हुन् ।
शव फेला नपरेपछि धार्मिक विधिअनुसार अन्तिम संस्कार गरेको परिवारले जनाएका छन् । सृष्टि पर्साको सखुवा प्रसौनी गाउँपालिकामा रेडियोग्राफरको रुपमा कार्यरत रहेकी थिइन् । उनी परीक्षा दिनका लागि काठमाडौंतर्फ जाँदै थिइन् ।
उनी चढेको बागमती प्रदेश ०३–००६ख १५१६ नम्बरको एन्जल र काठमाडौंबाट गौरतर्फ जाँदै गरेको बागमती प्रदेश ०३–००१ख २४९५ नम्बरको गणपती डिलक्स बस असार २८ गते सिमतालको पहिरोमा परी त्रिशूली नदीमा खसेको थियो ।
उक्त घटनामा ६५ यात्रुमध्ये ६२ जना बेपत्ता भएका थिए । बेपत्तामध्ये हालसम्म २० जनाको शव फेला परेको छ भने ४२ जनाको अवस्था अज्ञात छ । उक्त घटनामा बाराका चार यात्रु परेका थिए । सृष्टिसँगै प्रसौनी गाउँपालिकाका- २ का ताराचन्द कुर्मी, उनकी पत्नी कुसुवदेवी र बारा बिश्रामपुर ३ का प्रमानन्द पण्डित पनि बसमा सवार थिए। शव फेला पर्ने स्थिति नदेखेपछि कुर्मीको परिवारले यसअघि नै कुशको शव बनाएर अन्तिम संस्कार गरिसकेका छन् ।
प्रतिक्रिया दिनुहोस !
