काठमाडौं : कांग्रेस सभापति एवं पूर्वप्रधानमन्त्री शेरबहादुर देउवाले कांग्रेसीहरू पढ्दैनन् भन्ने भाष्य चिर्न आवश्यक रहेको बताएका छन् । प्रथम जननिर्वाचित प्रधानमन्त्री विश्वेश्वरप्रसाद कोइरालाको ४२औं स्मृति दिवसको अवसरमा नेपाली कांग्रेस केन्द्रीय पुस्तकालय शुभारम्भ कार्यक्रमलाई आइतबार सम्बोधनका क्रममा यस्तो बताएका हुन् । सभापति देउवाले कांग्रेसले पढ्दै पढ्दैनन् भन्ने भनाइ रहेको भन्दै पुस्तकालय शुभारम्भ भएसँगै कांग्रेसीहरूले अध्ययन गर्ने बानी बसाल्न अनुरोध पनि गरे ।
देउवाले विश्वेश्वरप्रसाद कोइराला राजनीतिदेखि साहित्यलगायतका हरेक विधामा सक्षम रहेको र उनको योगदान अविस्मरणीय रहेको बताए । कोइराला राजनीतिमा आफ्नो जीवनभर आफ्ना सिद्धान्त स्थापित गर्न र राष्ट्रको लागि जुनसुकै बलिदान गर्न तयार रहेको व्यक्ति भएको चर्चा पनि देउवाले गरे ।
देउवाले भने, ‘एउटा भन्ने चलन छ, कांग्रेसले पढ्दै पढ्दैन भनेर । अब लाइबे्ररी भएपछि अवश्य नै पढ्नुहुनेछ भन्ने लाग्छ मलाई । बीपी कोइरालाको सम्बन्धमा मैले भन्ने गरेको छु, धेरै ठूलो व्यक्ति हो । उहाँ हरचिजमा साहित्यकार, साइकोलोजिस्ट सबै कुरामा योग्य हुनुहुन्थ्यो । राजनीति र साहित्यका साथसाथै धेरै कुरामा उनको योगदान छ । राजनीतिमा उहाँ जिन्दगीभर कहिल्यै नथाकेर आफ्नो सिद्धान्त र राष्ट्रको लागि जुनसुकै बलिदान गर्न तयार भएको व्यक्ति हो ।’
कार्यक्रममा कांग्रेस महामन्त्री गगनकुमार थापाले कांग्रेसले आफूलाई नयाँ बनाउन आफूभित्रै रहेका कमजोरीहरूको सुधार गर्न आवश्यक रहेको बताए । उनले कांग्रेसभित्र पठन संस्कृति छ भन्ने कुराको पुस्तकालय उद्घाटन कार्यक्रमले पनि प्रमाणित गर्ने बताए । उनले सबैलाई पठन संस्कृतिको विकास गर्न आवश्यक रहेको बताए । उनले कांग्रेसले गर्ने बहस आम नागरिकलाई सूचित गर्ने र तथ्यमा आधारित हुनुपर्ने बताए ।
थापाले भने, ‘नेपाली कांग्रेसले आफूलाई नयाँ बनाउनका लागि परपर खोज्न जाने होइन । आफैंभित्र खोज्नुपर्छ । हामीसँगै छ त्यो । हामीभित्रै छ । त्यसैले पठन संस्कृतिलाई फेरि एकपटक नेपाली कांग्रेसभित्र छ, तर अझै यसलाई बढाउनुपर्छ । अझ उज्यालो बनाउनुपर्छ । कांग्रेसको साथीहरू विभिन्न जिम्मेवारीमा हुनुहुन्छ, हाम्रो लाखौं साथीहरू हुनुहुन्छ । कांग्रेसको साथीहरूले जहाँ छलफलमा भाग लिनुहुन्छ, हामीले गर्ने बहसको पाटो त्यो सूचित बहस नै हो । त्यो तथ्यमा आधारित हुनुपर्छ । हामी बहकिनु हुँदैन । हाम्रो जिम्मेवारी हो । त्यसका निम्ति पनि पठन संस्कृति अनिवार्य छ । त्यसका लागि पुस्तकालयले प्रेरित गर्दछ । हामीलाई एउटा स्रोत केन्द्र पनि चाहिएको छ ।’
बीपी भन्नेबित्तिकै अध्ययनशील नेताका रूपमा परिचित हुन् । उनै नेताको स्मरणमा कांग्रेसले उक्त लाइब्रेरी स्थापना गरेको हो । नेपाली साहित्यमा कोइरालाका कथा, उपन्यास र कविता गरेर डेढ दर्जन बढी कृति प्रकाशित छन् ।
जीवनको लामो समयसम्म कांग्रेसको नेतृत्व गरी २०१५ सालको आमनिर्वाचनमा कांग्रेसले दुईतिहाइ बहुमत प्राप्त गरेपछि प्रथम जननिर्वाचित प्रधानमन्त्री बनेका कोइरालाले नेपालमा राष्ट्रियता, प्रजातन्त्र र समाजवाद स्थापनाका लागि राजनीतिक नेतृत्व प्रदान गरे । प्रधानमन्त्रीकालमा उनले बिर्ता उन्मूलन र ‘जग्गा जोत्नेको हुनुपर्छ’ भन्ने भूमिसुधार कार्यक्रम ल्याएका थिए ।
प्रतिक्रिया दिनुहोस !
