सिन्धुलीमा लागुऔषध खरिद बिक्री गर्ने चार जना पक्राउ
![सिन्धुलीमा लागुऔषध खरिद बिक्री गर्ने चार जना पक्राउ](https://annapurnapost.prixacdn.net/media/albums/Pakrau_arrest_20211205143058_k2YYqUppZs_YCW6I0AzOf.jpg)
सिन्धुली : सिन्धुलीमा अवैध लागुऔषध खरिद बिक्री गर्ने चार जना पक्राउ परेका छन्। सिन्धुली प्रहरीले बिपी राजमार्ग अन्तर्गत सिन्धुली–भीमान खण्डको बाघमाराबाट चार जना पक्राउ गरेको हो।
पक्राउ पर्नेहरूमा महोत्तरी औरही नगरपालिका-७ महोत्तरी बस्ने अजय शाह, सिन्धुली कमलामाई नगरपालिका-७, माझिटारका दिलसन भनिने वर्ष २० का लोकविक्रम आले मगर, कमलामाई नगरपालिका-५ चिसापानीका २३ वर्षको मिलन पाख्रिन र कमलामाई नगरपालिका-६ धुराबजारका वर्ष २७ का सौगात लामा रहेका छन्।
उनीहरूलाई एक्सिप्लोन १५ र विनक्रेक्स कप सिरप १४ बोतल अवैध लागुऔषधसहित कमलामाई नगरपालिका-८ बाघमाराबाट पक्राउ गरिएको हो। इलाका प्रहरी कार्यालय भिमानले प्रहरीले चेकजाँच गर्ने क्रममा बा ९३ प ८८०८ र विआर ३० एम १३११ नम्बरको दुई वटा मोटरसाइकल समेत प्रहरीले नियन्त्रणमा लिएको सिन्धुलीका प्रहरी प्रमुख गोविन्दराज काफ्लेले बताए।
प्रहरीले चेकजाँच गर्ने क्रममा सोधपुछ गर्दा आले मगर, पाख्रिन र लामाले महोत्तरी औरही नगरपालिका-७ का २१ वर्षीय अजय शाहसँग अवैध लागुऔषध खरिद गरेको बयान दिएपछि शाहलाई समेत पक्राउ गरिएको हो। पक्राउ परेका चारै जनालाई जिल्ला अदालत सिन्धुलीबाट ७ दिनको म्याद थप गरेर घटनाबारे थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)