भक्तपुर : मध्यपुर थिमिमा टिपरको ठक्करबाट मोटरसाइकल चालकको मृत्यु भएको छ।
मध्यपुर थिमि नगरपालिका-४ स्थित नयाँ ठिमी सडक खण्डमा काठमाडौंबाट भक्तपुर तर्फ आइरहेको बागमती प्रदेश ४ ख २९०१ नम्बरको टिपरले सोही दिशातर्फ सवार गण्डकी प्रदेश ७ प ५३५३ नम्बरको मोटरसाइकललाई ठक्कर दिँदा चालक २१ वर्षीय सुवास तामाङको मृत्यु भएको हो।
प्रहरी परिसर भक्तपुरका प्रहरी निरीक्षक टेकेन्द्र पौडेलले आज बिहान १:२० बजे दुर्घटना भएको र चालकलाई घाइते भई तत्कालै उपचारका लागि नयाँ ठिमीस्थित मध्यपुर हस्पिटलमा लाने क्रममा मृत्यु भएको बताए। उनले चलाएको मोटरसाइकलको पछाडि सवार बेथानचोक गाउँपालिका-६ घर भई कमलबिनायक बस्दै आएका २० वर्षीय सन्जीव थापा मगरलाई भने गम्भीर घाइते भएपछि उपचारको लागि मध्यपुर हस्पिटलमा लगिएको छ।
प्रहरी निरीक्षक पौडेलका अनुसार टिपर चालक काभ्रे जिल्लाको मण्डन्देउपुर नगरपालिका-६ घर भएका २१ वर्षीय राज कुमार राई र टिपरलाई प्रहरी वृत्त ठिमीले नियन्त्रणमा राखी अनुसन्धान गरिरहेको छ।
मृतक तामाङ भने सोही जिल्ला मण्डन्देउपुर नगरपालिका-१ भई भक्तपुरको कमलबिनायकमा बस्दै आएका थिए। प्रहरी परिसर भक्तपुरका अनुसार शव पोस्टमार्टमका लागि केएमसी मेडिकल शिक्षण अस्पताल लगिएको छ।
प्रतिक्रिया दिनुहोस !
