विराटनगर : विराटनगरमा आइतबार राति विद्यार्थीबीच कुटाकुट हुँदा एक जना घाइते भएका छन्। घाइतेको नोबेल शिक्षण अस्पतालमा उपचार भइरहेको छ।
प्रहरीका अनुसार विराटनगर महानगरपालिका–१ स्थित ल क्याम्पसनजिक राति ९:३५ बजेतिर घटना भएको हो। कुटपिटबाट बाराको कलैया नगरपालिका–१३ घर भइ विराटनगर–१ मा डेरा बस्दै आएका २१ वर्षीय रवीन्द्रप्रसाद कुशवाहा घाइते भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए।
उनका अनुसार कुशवाहाको निधार र टाउकोमा चोट लागेको छ। अवस्था मध्यम रहेको प्रहरीले जनाएको छ। प्रहरीका अनुसार ल क्याम्पसमा अध्ययनरत विद्यार्थीबीच सामान्य विवाद हुँदा कुटपिट भएको पाइएको छ।
कुशवाहालाई पर्साको वीरगन्ज उपमहानगरपालिका–११ घर भएका २३ वर्षीय मिकलेश चौहानसहित ४ जनाको समूहले आक्रमण गरेको डीएसपी बस्नेतले बताए। उनका अनुसार चौहानलाई नियन्त्रणमा लिएर घटनाको अनुसन्धान सुरु गरिएको छ। घटनामा संलग्न अन्य फरार रहेकाले खोजी तीव्र पारिएको जानकारी उनले दिए। उनीहरुबीचमा के विषयलाई लिएर विवाद भएको थियो भनेर प्रहरीले खुलाएको छैन।
प्रतिक्रिया दिनुहोस !
