काठमाडौं : सर्वोच्च अदालतको बृहत् पूर्ण इजलासले अदालतको अपहेलना मुद्दामा ‘सीधा कुरा’ नामक अनलाइन र युट्युब च्यानलका प्रकाशक, कार्यकारी सम्पादक विरुद्धको मुद्दामा भदौ ६ गते फैसला (निसु) को मिति तोकेको छ। अदालतको बृहत् पूर्ण इजलासले बिहीबार उक्त मुद्दामा सुनुवाइ गरी फैसलाको मिति निर्धारण गरेको हो।
सर्वोच्चका सूचना अधिकारी गोविन्द घिमिरेका अनुसार मुद्दाको बहसमा सहभागी कानुन व्यवसायीहरूलाई १५ दिनभित्र ‘बहस नोट’ पेस गर्ने समय दिइएको छ। त्यसपछि भदौ ६ गते निसुको मिति तोकिएको घिमिरेले जानकारी दिए।
सर्वोच्च अदालतले सीधा कुरा अनलाइनका सञ्चालक युवराज कँडेल र कार्यकारी सम्पादक नवीन ढुंगानालगायत विरुद्ध अदालतको अपहेलना मुद्दा फैसलाका लागि ९ जना न्यायाधीशको बृहत् पूर्ण इजलास गठन गरेको थियो। बृहत् पूर्ण इजलासमा प्रधानन्यायाधीश विश्वम्भरप्रसाद श्रेष्ठ, न्यायाधीशहरू प्रकाशमान सिंह राउत, सपना प्रधान मल्ल, प्रकाशकुमार ढुंगाना, हरिप्रसाद फुँयाल, नहकुल सुवेदी, विनोद शर्मा, महेश शर्मा पौडेल र बालकृष्ण ढकाल छन्।
‘सीधा कुरा’ नामको अनलाइनले सर्वोच्च अदालतका न्यायाधीश, मिडिया सञ्चालक, कानुन व्यवसायीका सम्बन्धमा भ्रामक प्रचार सामग्री तयार पारी प्रसारण र प्रकाशन गरेको थियो। उक्त कार्यले अदालतको न्याय सम्पादनमा नै असर परेको भन्दै सर्वोच्च अदालतका उपरजिष्ट्रार गोविन्द घिमिरेले सीधा कुराविरुद्ध अदालतको अपहेलना मुद्दामा निवेदन दिएका थिए।
‘सीधा कुरा’ले तयार पारेको अडियो सामग्री भ्रामक र असत्य भएको प्रहरी अनुसन्धानबाट स्पष्ट भइसकेको छ। प्रहरीले तयार पारेको प्रतिवेदनका आधारमा सीधा कुराका प्रकाशक र कार्यकारी सम्पादकविरुद्ध जिल्ला अदालत काठमाडौंमा मुद्दा दायर भएको छ। कँडेल र ढुंगाना फरार छन्।
प्रतिक्रिया दिनुहोस !
