८ सदस्यीय मन्त्रिपरिषदमा मुख्यमन्त्रीसहित तीन मन्त्रालय एमाले र ४ मन्त्रालय कांग्रेसले पाएको छ । कांग्रेस सरकारमा सहभागी भएसँगै मुख्यमन्त्री कँडेलले सोमबार संसदबाट विश्वासको मत लिने तयारी गरेका छन् ।
वीरेन्द्रनगर : कर्णाली प्रदेश सरकारका नवनियुक्त चारजना मन्त्रीहरूले शपथ लिएका छन् । नेपाली कांग्रेसको तर्फबाट शुक्रबार सिफारिस भएका चारजना मन्त्रीहरूले आइतबार पद तथा गोपनीयताको शपथ लिएका हुन् ।
नवनियुक्त मन्त्रीहरूलाई प्रदेश प्रमुख यज्ञराज जोशीले आइतबार शपथ खुवाएका छन् । प्रदेश सरकारमा नेपाली कांग्रेसबाट आर्थिक मामिला तथा योजना मन्त्री राजीवविक्रम शाह, सामाजिक विकास मन्त्री घनश्याम भण्डारी,उद्योग,पर्यटन,वन तथा वातावरण मन्त्री सुरेश अधिकारी, जलस्रोत तथा ऊर्जा मन्त्री विजया बुढा मन्त्री बनेका हुन् ।
कांग्रेसबाट सरकारमा सहभागी हुने मन्त्रीहरूको नाम शुक्रबार नै मुख्यमन्त्री तथा मन्त्रिपरिषदको कार्यालय पठाइए पनि आन्तरिक तयारी नपुगेको भन्दै मुख्यमन्त्री यामलाल कँडेलले शपथ अगाडि बढाएका थिएनन् । जम्मा ८ सदस्यीय मन्त्रिपरिषदमा मुख्यमन्त्रीसहित तीन मन्त्रालय एमाले र ४ मन्त्रालय कांग्रेसले पाएको छ । कांग्रेस सरकारमा सहभागी भएसँगै मुख्यमन्त्री कँडेलले सोमबार संसदबाट विश्वासको मत लिने तयारी गरेका छन् ।
प्रदेश सरकारमा नयाँ अनुहार
कर्णालीमा प्रदेश सरकारमा नयाँ अनुहारले प्रवेश पाएका छन् । केन्द्रमा कांग्रेस–एमालेको सत्ता समीकरण बनेपछि सरकारमा पुनरागमन भएको कांग्रेसले प्रदेश सरकारमा सबै नयाँ अनुहार पठाएको छ । यसअघि पनि मन्त्रीका लागि दौडधुप गरेर पनि मन्त्री बन्न नसकेका प्रदेश सांसद राजीवबिक्रम शाह अहिलेको गठबन्धन सरकारमा आर्थिक मामिला तथा योजना मन्त्री बनेका छन् ।
ललितपुरमा जन्मेका शाहको अहिले स्थायी ठेगाना जाजरकोटको शिवालय गाउँपालिका वडा नं.९ हो । उनलाई प्राय : समाजसेवीका रूपमा चिन्ने गरिन्छ । स्नातकसम्मको अध्ययन पुरा गरेका शाहीले १ दर्जनभन्दा बढी देशहरूमा भ्रमण गरेका छन् । उनको राजनीतिक पृष्ठभूमि खासै लामो भने छैन । उनी २०७० मा जाजरकोट जिल्ला निर्वाचन क्षेत्र–२ बाट संविधानसभा सदस्य निर्वाचित भएका थिए । अहिले पार्टीको केन्द्रीय सदस्य रहेका उनी खेलतर्फ पनि अग्रसर छन् ।
सामाजिक विकास मन्त्री बनेका घनश्याम भण्डारी पूर्व पत्रकार हुन् । दुल्लु नगरपालिका वडा नं. ८, मा २०४० असार १४ गते जन्मिएका भण्डारी २०५६ सालमा नेविसंघको रत्नराज्य लक्ष्मी क्याम्पसको इकाई सचिव भए । उनी कांग्रेस निकट पत्रकारको संस्था नेपाल प्रेस युनियन दैलेखको संस्थापक सभापति समेत हुन् । यस्तै पत्रकार महासंघको जिल्ला सचिव समेत बनेका भण्डारी पछिल्लो समय दैलेखमा देउवा पक्षको बागडोर समाल्ने नेता हुन् । यसअघिको कांग्रेस जिल्ला अधिवेशनमा उनी देउवा समूहबाट जिल्ला सभापतिमा पराजित उम्मेदवार पनि हुन् ।
नेपाली कांग्रेसको दैलेख क्षेत्र नं.२ को दुई पटक क्षेत्रीय सभापति रहेका उनी २०७४ मा दुल्लु नगरपालिकाको मेयर निर्वाचित भएका थिए । २०७९ सालमा दैलेख २ (क) बाट प्रत्यक्षतर्फ चुनाव लडेर निर्वाचित भएका उनी अहिले पनि प्रदेशसभा सामाजिक विकास समितिका सभापति समेत छन् । एमएसीसम्मको अध्ययन गरेका उनी विभिन्न सामाजिक अभियानमा पनि सक्रिय व्यक्ति हुन् ।
उद्योग, पर्यटन, वन तथा वातावरण मन्त्री बनेका सुरेश अधिकारी २०४६ को जनआन्दोलनका क्रममा हिरासत समेत बसेका नेता हुन् । उनी नेपाल विद्यार्थी संघको तर्फबाट सल्यान बहुमुखी क्याम्पसको संस्थापक स्ववियु सभापति, नेपाल निजामती कर्मचारी संघको संस्थापक सल्यान जिल्ला अध्यक्ष, शारदा नगरपालिका सल्यानको प्रथम नगर प्रमुख समेत भइसकेका छन् । कांग्रेसभित्र शेखर कोइराला समूहका उनी अहिले कांग्रेस सल्यानको प्रदेशसभा २ (ख) को क्षेत्रीय सभापति छन् भने सोही क्षेत्रबाट प्रत्यक्षतर्फ चुनाव लडेर सांसद बनेका हुन् । उनले स्नातकोत्तरसम्मको अध्ययन गरेका छन् ।
यस्तै हुम्लाको खार्पुनाथ गाउँपालिका वडा नं. १ मा २०३५ साउन ८ गते जन्मिएकी जलस्रोत तथा ऊर्जा विकास मन्त्री विजया बुढा २०५९ सालदेखि सक्रिय रूपमा कांग्रेसको राजनीतिमा लागेकी महिला नेतृ हुन् । २०६३ सालमा तरुण दलको जिल्ला सचिव भएकी उनी २०६३ सालमा महिला सघ हुम्लाको सचिव हुँदै २०६४ सालमा महाधिवेशन प्रतिनिधि भएकी थिइन् । उनी २०७९ सालको निर्वाचनमा समानुपातिक कोटाबाट प्रदेशसभा सांसद बनेकी हुन्।
प्रतिक्रिया दिनुहोस !
