सरकारले भन्यो- बंगलादेशका जनता संक्रमणलाई शान्तितर्फ लैजान सक्षम हुनेछन्
साउन २३, २०८१ बुधबार २२:१३:४२
काठमाडौं : सरकारले बंगलादेशमा भएको पछिल्लो परिस्थितिबारे औपचारिक धारणा सार्वजनिक गरेको छ। परराष्ट्र मन्त्रालयले बुधबार विज्ञप्ति जारी गरेर बंगलादेशका जनतालाई शान्त र संयमता अपनाउन अपील गरेको छ।
सरकारले बंगलादेशको लोकतान्त्रिक प्रक्रिया फिर्ता हुनेमा जोड दिएको छ। 'हामी सबैलाई शान्त र संयमको लागि आह्वान गर्दछौं। हामी विश्वस्त छौं, बंगलादेशका जनताले संक्रमणलाई शान्ति र स्थिरतातर्फ सहज लैजान सक्षम हुनेछन्,' विज्ञप्तिमा भनिएको छ।
त्यस्तै सरकारले बंगलादेशको पछिल्लो राजनीतिक घटनाक्रमलाई नजिकबाट नियालिरहेको र विरोध प्रदर्शनका क्रममा भएको जनधनको क्षतिप्रति गहिरो चिन्ता व्यक्त गरेको छ। सरकारले प्रदर्शनका क्रममा ज्यान गुमाउनेहरूका परिवारजनमा गहिरो समवेदना र घाइतेहरूको शीघ्र स्वास्थ्य लाभको कामना गरेको छ।
प्रतिक्रिया दिनुहोस !
