जेलबाट छुटेको सातौं दिनमा जसले १५ तोला सुन र ६० तोला चाँदी चोरे

धनगढी : मोबाइल चोरेको आरोपमा कैलाली कारागारमा साढे तीन वर्ष जेल सजाय र ३० हजार जरिवाना तिरेर छुटेका एकजनाले ठूलो परिणाममा सुन-चाँदी चोरी गरेको खुलेको छ। भीमदत्त नगरपालिका वडा नम्बर १८ कञ्चनपुर स्थायी ठेगाना भएका र धनगढी -१ एलएनचोक बस्ने ३१ वर्षीय हर्कबहादुर गिरिले जेलबाट छुटेको सातौं दिनमा घर फोडेर १५ तोला सुन,६० तोला बढी चाँदी र २५ हजार नगद चोरी गरेका हुन् । 

उनले धनगढी उपमहानगरपालिका वडा नम्बर ४ बसपार्क नजिक बस्ने योगेन्द्र ओझाको घरको ताला तोडेर उक्त गरगहना र नगदी चोरी गरेको प्रहरीले जनाएको छ।

जिल्ला प्रहरी कार्यालय कैलालीका प्रहरी उपरीक्षक पदमबहादुर विष्टले पक्राउ परेका गिरिको साथबाट ५५ तोला चाँदी र ६ हजार नगद बरामद गरिए पनि सुन भने बरामद भइनसकेको बताए ।  ‘चाँदीको टीकादानी, करुवा, कचौरा र अरु गहना बरामद भएका छन्। नगद रकममा पनि ६ हजार जति बरामद भएको छ । पीडितले चोरी भएका भाँडाकुडा र गरगहना पहिचान गरिसकेका छन् तर सुनको पत्तो लागेको छैन, अनुसन्धान भइरहेको छ,'प्रहरी उपरीक्षक विष्टले भने ।

गिरिको आपराधिक यात्रा

गिरिको स्थायी घर भीमदत्त नगरपालिकाको वडा नम्बर १८ कञ्चनपुर हो । उनी २६ वर्षको उमेरमा (२०७७ सालमा) धनगढी आएर चोरीजन्य अपराधमा संलग्न भएको खुल्न आएको छ। । सुरूका दिनमा मोबाइल चोरीमा संलग्न रहे।  धनगढी उपमहानगरपालिका वडा नम्बर ४ का महेशराज जोशीको मोबाइल चोरेपछि उनीविरुद्ध मुद्धा परेको थियो। । गिरिविरुद्ध जोशीले २०७७ साल कार्तिक २७ गते जिल्ला प्रहरी कार्यालय कैलालीमा मुद्दा दर्ता गरेका थिए । उनी पक्राउ पनि परे । गिरिलाई जिल्ला अदालत कैलालीले २०७७ सालको चैत ४ गते चोरीको मुद्दामा साढे ३ वर्ष कैद र ३० हजार जरिवाना तोक्यो । 

कैलाली कारागारका प्रमुख दिपक जोशीले गिरि साढे ३ वर्षको सजाय भुक्तान गरेर यसै साउनको १७ गते जेलमुक्त भएको बताए। उनले जेलमुक्त भएको सातौं दिन अथवा साउनको २३ गते दिउँसो साढे ११ बजेतिर ओझाको बसपार्क नजिकैको घरको २ वटा ताला तोडेर दराजभित्र राखेको सुन,चाँदी र नगदी चोरी गरेका थिए ।

उनले चोरी गरेका गहना आफ्नो धर्मदिदीको माइतीघरमा ( धनगढी- १ नैनादेबी गेट नजिक) लुकाएर राखेर  राति अमित प्लाजाभित्रको गल्लीमा रहेको आफ्नो साथीको घर गएका थिए। चोरीको गहना बिक्री गरेको रकमले पार्टी गरिरहेका बेला उनलाई बिहीबार प्रहरीले पक्राउ गरेको हो । 

यसरी पत्ता लाग्यो सुराक

ओझाको घरनजिकैको सीसी क्यामेरा गिरिको सुराक पत्ता लगाउने मुख्य कारण बन्यो । उनले घरमा पसेको, निस्केको र त्यहाँबाट बाहिर बजारतिर गएको सीसी क्यामेराको भीडीयो प्रहरीले फेला पारेको छ । त्यही भीडीयोको आधारमा प्रहरीले उनलाई मुख्य बजारमा पनि खोज्दै हिँडेको थियो। उनी रातोपुलबाट अटो चढेर नैनादेवी मन्दिर जाने गेट नजिक गए । त्यहाँ अटोबाट ओर्लिएका उनले मुख्यबजारमै रहेको धर्मदिदीको माइतीको घर गएको भिडियोले प्रहरीले उनको पहिचान गरेको हो । 

गिरिलाई शुक्रबार जिल्ला अदालत कैलालीबाट म्याद थप गरेर अनुसन्धान भइरहेको मुद्दा शाखाका इञ्चार्ज उपेन्द्र बमले जनाएका छन्।