अर्घाखाँची : अर्घाखाँचीको भक्तिटोला चुत्राबेसीमा रहेको सिद्धेश्वर शिवालयमा साउनको अन्तिम सोमबार आज बिहानैदेखि भक्तजनको भीड बढेको छ । दैनिकरुपमा वैदिक विधिपूर्वक विशेष पूजाआजा भइरहेको यस मन्दिरमा साउनको सोमबार रुद्री तथा शिवजीको विशेष पुजाआजाहुँदै आएको मन्दिरका पुजारी पण्डित सुमन्त प्रसाद पोख्रेलले बताए।
पवित्र महिना साउन र त्यसमा पनि सोमबार छुट्टै विशेषता रहन्छ । साउने सोमबारका दिन भगवान् शिवको विशेष पूजाआराधना गर्ने परम्परा छ । ज्योतिषशास्त्रअनुसार सोमबारको स्वामी भगवान् शिव भएकाले यो दिनको शिवोपासना विशेष मानिन्छ ।
अझ यो महिनाको सोमबार गरिने शिवको व्रत पूजा विशेष फलदायी हुने मान्यता छ । सोमबारको व्रतको प्रभावले पार्वतीले महादेव स्वामी पाएको धार्मिक मान्यता रहेको छ ।
ऐतिहासिक, धार्मिक तथा पर्यटकीय महत्व बोकेको सुन्दर प्राकृतिक मनोरमस्थल सिद्धेश्वर शिवालय मन्दिरमा स्फटिकको शिवलिङ्ग राखि दैनिक वैदिक विधि पूर्वक पूजा आजा गरिँदै आएको मन्दिरका संरक्षक नारायण प्रसाद खनालले बताएका छन् ।
सूर्य दक्षिणायनपछि विशेष चार्डपर्वको सुरुवातको संकेत गर्ने पूर्वीय संस्कृतिमा साउने सोमबार आफैमा विशेष महत्वको महिना हो । सोमबार शिवको पूजाआजा गर्दा मनोकांक्षा पूरा हुने विश्वासका साथ बिहानैदेखि भक्तजनहरू मन्दिरमा पूजाआजा गरिरहेका छन् ।
प्रतिक्रिया दिनुहोस !
