प्ले स्टोरमा करोड डाउनलोड पूरा गर्ने पहिलो डिजिटल वालेट बन्यो इसेवा

काठमाडौं : नेपालको पहिलो भुक्तानी सेवा प्रदायक कम्पनी इसेवा लिमिटेडको गुगल प्ले स्टोरमा १ करोड (१० मिलियन) भन्दा बढी डाउनलोड पूरा भएको छ। यो उपलब्धि हासिल गर्ने इसेवा, नेपालको पहिलो डिजिटल वालेट एप हो। इसेवाले १ करोड डाउनलोडलाई 'खुसीका १ करोड पलहरू' भनेर मनाएको छ।

नगदरहित अर्थतन्त्रको परिकल्पना गर्दै सन् २००९ मा बेटा भर्जन रिलिज गरी २०१० जनवरी २५ बाट सेवा सुरु गरेको इसेवाले यो अवधिमा नगदरहित (क्यासलेस) अर्थतन्त्र निर्माणको बाटोमा महत्वपूर्ण योगदान पुर्‍याएको छ। इसेवाले नेपालका सुविधा सम्पन्न क्षेत्रदेखि विकट बस्तीहरूमा हुने आर्थिक कारोबारलाई डिजिटल माध्यममार्फत धेरै सहजता ल्याएको छ। यो यात्रामा आम मानिसलाई जुनसुकै सेवाको लागि लाइन बस्नुपरेमा सबैभन्दा पहिले इसेवालाई सम्झने अवस्थामा ल्याइ पुर्‍याएको छ। 

सन् २००९ मा स्थापना भई सेवा दिँद आएको यस कम्पनीले लगभग १६ वर्षको अन्तरालमा नै यो उपलब्धि हासिल गरेको हो। हालः नेपालको ७७ वटै जिल्लामा पहुँच भएको यस कम्पनीसँग १ करोडभन्दा बढी दर्ता भएका ग्राहकहरू, २ लाख ५० हजरभन्दा बढी एजेन्टहरू, ४९ बैङ्कहरू, ४५ लघुवित्तहरू ३ लाख ५० हजारभन्दा बढी मर्चेन्टहरू आबद्ध छन्। 

यस उपलब्धिमा उत्साह व्यक्त गर्दै कम्पनीका प्रमुख कार्यकारी अधिकृत जगदीश खड्काले १ करोड डाउनलोड गरी इसेवालाई माया गर्ने प्रयोगकर्ता, ग्राहक, एजेन्ट तथा मर्चेन्टहरू सम्पूर्णका धन्यवाद व्यक्त गरेका छन्। 'इसेवाको यो यात्रा यतिमा मात्र सीमित नभइ भविष्यमा नयाँ नयाँ प्रविधिहरू र नवीनताको साथ नयाँ प्रयोगकर्ताहरूको लागि पनि अनुकूल बनाउँदै अझै थप डाउनलोड बढ्ने कुरामा हामी विश्वस्त छौं।' कम्पनीका प्रमुख कार्यकारी अधिकृत जगदीश खड्काको भनाइ छ।